IAS, IPS अधिकाऱ्यांनो तुम्हाला लाखोंचा पगार देतो…आपचं आंदोलन आणि इशारा चर्चेचा विषय…

नाशिक : आयएएस, आयपीएस अधिकाऱ्यांनो आम्ही तुम्हाला लाखोंचे पगार देतो आम्हाला आमचे पार्किंगचे भूखंड परत द्या, ज्यांनी भूखंडे गिळले त्यांच्यावर कारवाई करा. अगोदर पार्किंगची जागा द्या आणि मगच वाहनांची टोइंग करा अशी मागणी करत नाशिकमध्ये आम आदमी पक्षाच्या वतिने आंदोलन करण्यात आले. आपचे नेते जितेंद्र भावे यांच्या नेतृत्वात आंदोलन करण्यात आले असून आंदोलनाच्या दरम्यान जोरदार घोषणाबाजी करण्यात आली. टोइंगच्या नावाखाली सुरू असलेली माफियागिरीचा आरोप करत आम आदमीच्या वतिने करण्यात आला इतकंच काय तर टार्गेट पूर्ण करण्यासाठी टोइंगचे ठेकेदार काम करतात आणि नाशिककरांना वेठीस धरतात असाही आरोप केला आहे. एकूणच नाशिक शहरात सुरुवातीपासूनच वादात राहिलेली टोइंग पुन्हा एकदा चर्चेत आली आहे. टोइंग करण्याच्या प्रक्रियेवरून अनेकदा वाद निर्माण झाले आहे. त्यातच टोइंग हे बेकायदेशीर असल्याचा देखील आरोप केला जात असल्याने आम आदमी पार्टीने कळीच्या मुद्द्याला हात घातला आहे.

आगामी महापालिका निवडणुकीच्या पार्श्वभूमीवर सक्रिय होऊ पाहत असलेली आम आदमी पार्टीने शहरातील टोइंग मुद्दा हाती घेत शहरात निदर्शने केली आहे.

टोइंगमुले अनेक वाहनधारक त्रस्त आहे, रस्त्याची अडवणूक झाली असेल किंवा जाणाऱ्या येणाऱ्या नागरिकांना अडथळा निर्माण होत असेल तर टोइंग करणे योग्य आहे.

मात्र, दिसेल ते वाहन उचलून टोइंग करणे आणि आर्थिक लूट करणे, ही माफियागिरी सहन केली जाणार नाही असेही आम आदमी पार्टीच्या नेत्यांनी म्हंटले आहे.

सुरुवातीपासूनच टोइंगचा मुद्दा वादग्रस्त ठरला आहे, त्यातच निवडणुकीच्या पार्श्वभूमीवर आम आदमी पार्टीने हा मुद्दा हाती घेऊन नाशिककरांच्या संतापाला मोकळी वाट करून दिली आहे.

अधिकारीही याबाबत योग्य ती कारवाई करत नाही, पार्किंग न देता ही कारवाई योग्य नसल्याने पार्किंगचे भूखंड कोणी चोरले त्याची चौकशी करा अशीही मागणी केली जात आहे.