Deenanath Mangeshkar Hospital : तनिषा भिसे मृत्यू प्रकरणानंतर राज्य सरकारचा धर्मादाय रुग्णालयांसाठी मोठा निर्णय

तनिषा भिसे मृत्यू प्रकरणानंतर राज्य सरकारने धर्मादाय रुग्णालयांसाठी नवे निर्देश जारी केले आहेत. दीनानाथ मंगेशकर रुग्णालयात तनिषा भिसे यांना अनामत रकमेअभावी उपचार नाकारण्यात आले होते. यात गर्भवती असलेल्या तनिषा यांचा मृत्यू झाला. महिलेला उपचार नाकारण्याच्या प्रकरणानंतर राज्य सरकारने धर्मादाय रुग्णालयांसाठी नवे निर्देश जारी केले आहेत. यापुढे अनामत रकमेअभावी उपचार नाकारू नयेत, कोणत्याही आपत्कालीन परिस्थितीत रुग्णांवर प्राधान्याने उपचार करण्यात यावेत; तसेच गर्भवतीवरील उपचाराचा आपत्कालीन परिस्थितीत समावेश करावा,’ असे यात प्रामुख्याने नमूद करण्यात आले आहे.

मंगेशकर रुग्णालयात गर्भवती महिलेला दाखल करून घेण्यास टाळाटाळ करण्यात आल्याचा प्रकार उघडकीस आला होता. या प्रकरणाची चौकशी करण्यासाठी धर्मादाय सहआयुक्त, पुणे यांच्या अध्यक्षतेखाली समिती स्थापन करण्यात आली होती. या समितीने चौकशी करून अहवाल व निष्कर्ष राज्य सरकारला सादर केले होते. या अहवालातील शिफारशींच्या अनुषंगाने सरकारकडून आठ मार्गदर्शक सूचना जारी करण्यात आल्या आहेत.

काय आहेत मार्गदर्शक सूचना?

रुग्णालयात जमा होणारा निर्धन रुग्ण निधी (आयपीएफ) शिल्लक नसल्याच्या कारणामुळे रुग्ण उपचारापासून वंचित राहू नये.

राज्यातील सर्व धर्मादाय रुग्णालयांनी महात्मा जोतिबा फुले जनआरोग्य योजना, आयुष्मान भारत योजना, राष्ट्रीय बाल स्वास्थ कार्यक्रम आदी आरोग्याशी संबंधित सर्व योजना लागू कराव्यात.

आयव्हीएफ खात्याबाबतची अद्ययावत माहिती रुग्णालयांकडून घेऊन ती धर्मादाय आयुक्त यांच्या संकेतस्थळावर नियमितपणे अद्ययावत करण्यात यावी, अशा यात सूचनांचा यात समावेश आहे.

मेडिकल कौन्सिल कधी निर्णय घेणार?

गर्भवतीच्या मृत्यूप्रकरणी दीनानाथ रुग्णालयाप्रमाणेच मणिपाल, सूर्या आणि इंदिरा आयव्हीएफ या रुग्णालयांना महाराष्ट्र मेडिकल कौन्सिलकडे (एमएमसी) अहवाल सादर करावा लागणार आहे.

या सर्व रुग्णालयांचा अहवाल मिळाल्यानंतर अभ्यास करून ‘एमएमसी’ अंतिम निर्णय देणार आहे. गर्भवती मृत्यू प्रकरणी सोमवारी मुंबईत सुनावणी झाली. गर्भवतीच्या नातेवाईकाने त्यांची बाजू मांडली.

ससूनचा अहवाल मेडिकल कौन्सिलला प्राप्त झाला आहे. त्यानंतर या तिन्ही हॉस्पिटलचा अहवाल आल्यानंतर योग्य ते निर्णय मेडिकल कौन्सिल घेणार आहे.