सोमेश्वर कारखान्याच्या निवडणुकीमध्ये ट्विस्ट, राष्ट्रवादीत फुट, पुरुषोत्तम जगताप भाजपच्या गळाला? कुणाचं फिसकटणार गणित…

Someshwar Sugar Factory Baramati: बारामतीमधील सोमेश्वर सहकारी साखर कारखान्याच्या निवडणुकीत मोठा ट्विस्ट आला आहे. अजितदादांच्या राष्ट्रवादीत इथं फुट पडल्याचा आणि पुरुषोत्तम जगताप हे वेगळी चूल मांडण्याची शक्यता वर्तवली जात आहे. त्यामागे अर्थातच एक मोठे कारण समोर आले आहे. आज, 30 सप्टेंबर ही उमेदवारी अर्ज मागे घेण्याची अंतिम मुदत आहे. अद्याप प्रमुख राजकीय गटांकडून अंतिम पॅनल जाहीर झालेले नाही. कारखान्याचे विद्यमान अध्यक्ष पुरुषोत्तम जगताप हे भाजपच्या आयोजित मेळाव्यात जात असल्याने चर्चांना पेव फुटले आहेत.

राष्ट्रवादीचे पुरुषोत्तम जगताप यांनी स्वतंत्र मेळाव्या बोलवल्यानंतर त्याच मेळाव्याला भाजपचे पदाधिकारी उपस्थित लावणार आहेत. पुरुषोत्तम जगताप भाजपच्या गळाला लागले का असा प्रश्न या निमित्ताने उपस्थित झाला आहे. भाजप आणि पुरुषोत्तम जगताप एकत्र मेळावा घेऊन पुढील दिशा ठरवणार असेल. आज बारामती तालुक्यातील वानेवाडी येथे पुरुषोत्तम जगतापांचा मेळावा आहे. उमेदवारी अर्ज मागे घेण्याचा आजचा शेवटचा दिवस आहे. दुपारी तीन वाजेपर्यंत उमेदवारी अर्ज मागे घेता येणार असं जरी असलं तरी अद्यापही एकाही पक्षाने न आपलं पॅनल जाहीर केलेलं नाही. दोन्ही राष्ट्रवादी शिवसेना आणि भाजप यांनी निवडणुकीच्या रिंगणात आहेत.

जगताप यांच्या भूमिकेकडे लक्ष

उमेदवारी अर्ज मागे घेण्याच्या अखेरच्या दिवशी पुरूषोत्तम जगताप यांनी सभासदांचा मेळावा आयोजित केला आहे. पुढील दिशा ठरवण्यासाठी हा मेळावा असल्याचे सांगण्यात ये आहे. सभासदांना मोठ्या संख्येने उपस्थित राहण्याचे आवाहन करण्यात आले आहे. या मेळाव्यात जगताप कोणती भूमिका मांडतात. कोणत्या उमेदवारांना सोबत घेण्याचे संकेत देतात, कोणती रणनीती आखतात याकडे सगळ्यांचे लक्ष लागले आहे.

दोन्ही राष्ट्रवादी एकत्र लढणार?

सोमेश्वर सहकारी साखर कारखान्याच्या निवडणुकीत अजितदादांची राष्ट्रवादी आणि शरदचंद्र पवार राष्ट्रवादी हे दोन्ही पक्ष स्वतंत्र पॅनलच्या तयारीत असल्याची चर्चा आहे. शरद पवार गटाकडून युगेंद्र पवार यांनी इच्छुकांच्या मुलाखतीही घेतल्याचे समोर आले .तर उपमुख्यमंत्री सुनेत्रा पवार यांच्या नेतृत्वात उमेदवार निवडीची चाचपणी झाली. या निवडणुकीत दोन्ही राष्ट्रवादी एकत्र निवडणूक लढवतील की स्वतंत्र पॅनल उभे करतील याकडे राजकीय वर्तुळाचे लक्ष लागले आहे.