शरद पवारांचे धक्क्यावर धक्के, भाजपला दुसरा मोठा झटका, पुण्यात राजकीय गणितं बदलणार?

लोकसभा निवडणुकीनंतर शरद पवारांच्या राष्ट्रवादीत जोरदार इनकमिंग सुरु आहे. गेल्या अनेक दिवसांपासून शरद पवारांच्या राष्ट्रवादीत प्रवेश करण्यासाठी नेत्यांच्या रांगा लागल्या आहेत. हर्षवर्धन पाटील यांच्यानंतर आता पुणे जिल्ह्यात भाजपला दुसरा धक्का बसणार आहे. राज्यसभेचे माजी खासदार आणि भाजप प्रदेश उपाध्यक्ष संजय काकडे लवकरच भाजपला सोडचिठ्ठी देत शरद पवार गटात दाखल होणार आहेत. काकडेंच्या पक्षप्रवेशामुळे पुणे जिल्ह्यातील राजकीय गणितं बदलण्याची शक्यता आहे. 2019 च्या विधानसभा निवडणुकीपूर्वी जी परिस्थिती राष्ट्रवादी काँग्रेसची होती, तीच आता भाजपची झाली आहे. निवडणुकीच्या तोंडावर दिग्गज नेते भाजपला सोडचिठ्ठी देताना दिसत आहेत. पश्चिम महाराष्ट्रात भाजपला मोठे धक्के बसताना दिसत आहेत. समरजीत घाडगे, हर्षवर्धन पाटील, त्यानंतर आता संजय काकडे शरद पवार गटाच्या वाटेवर आहेत. उपमुख्यमंत्री देवेंद्र फडणवीस यांच्याशी औपचारिक बैठक करून दसऱ्यानंतर पक्षप्रवेश करणार असल्याचं काकडे यांनी स्पष्ट केलंय.

संजय काकडे यांनी यापूर्वी लोकसभा आणि विधानसभा निवडणुकीत सोशल मीडियाच्या माध्यमातून पक्षावर नाराजी व्यक्त केली होती. भाजपमध्ये मला सध्या कुठलंही काम नसून नुसतं पदावर राहण्यात काहीच अर्थ नाहीय. त्यामुळे मंगळवारी ते भाजप राज्य उपाध्यक्ष पदाचा राजीनामा देणार आहेत. माझ्यासोबत पुण्यातील 10 ते 15 माजी नगरसेवक आणि आणि काही माजी आमदार संपर्कात असल्याचा दावा काकडेंनी केलाय.

कोण आहेत संजय काकडे?

• संजय काकडे हे सध्या भाजपचे प्रदेश उपाध्यक्ष आहेत
• राज्यसभेचे माजी खासदार होते
• अपक्ष खासदार म्हणून काकडेंनी भाजपला केंद्रात पाठींबा दिला होता.
• काकडे यांचे पुण्यातील आठही विधानसभा मतदारसंघात समर्थक आहेत.
• पुणे महानगरपालिका निवडणुकीत विजय काकडे यांची निर्णायक भूमिका असते.
• संजय काकडे यांचे सर्वपक्षीय नेत्यांसोबत चांगले संबंध आहेत.
• पुणे जिल्ह्यातील मराठा चेहरा म्हणून संजय काकडे यांची ओळख आहे.

भाजपला मोठा धक्का

ऐन विधानसभा निवडणुकीच्या तोंडावर संजय काकडे भाजपला सोडचिठ्ठी देत असल्यामुळे भाजपाला हा मोठा धक्का आहे. याचा परिणाम विधानसभा निवडणुकीत दिसणार असं राजकीय विश्लेषकांचं मत आहे. दरम्यान, विधानसभा निवडणुकीच्या तोंडावर पश्चिम महाराष्ट्रात भाजपला मोठे धक्के बसताना दिसत आहेत, तर दुसरीकडे शरद पवार गटात इन्कमिंग वाढल्याने पक्षाची ताकद वाढत आहे. पक्षातून जाणाऱ्या नेत्यांना थांबवणं हेच भाजपसाठी सध्या मोठा आव्हान असणार आहे.