Pune crime : दारूच्या नशेत का राहतो, अशी विचारणा केली म्हणून सख्ख्या मावस भावाची निर्घृण हत्या; मद्यपीला बारामतीत अटक

बारामती, पुणे : सख्ख्या मावसभावाने भावावर कात्रीने तब्बल 38 वार करून हत्या (Brutal murder) केल्याचा धक्कादायक प्रकार घडला आहे. आज दुपारी साडेबारा वाजता रुई शासकीय रुग्णालयाच्या पाठीमागील बाजूस राहणाऱ्या गजानन पवार या 28 वर्षीय युवकाची निर्घृण हत्या करण्यात आली आहे. गजानन याचा मुलगा शाळेतून घरी आल्यानंतर रक्ताच्या थारोळ्यात पडलेला त्याचा पिता त्याला दिसला. तो घाबरला. त्याच अवस्थेत लहान मुलाने शेजारच्यांना ही घटना सांगितली. त्यानंतर बारामती तालुका पोलिसांना (Baramati Police) याची माहिती देण्यात आली. तत्काळ पोलिसांचे पथक घटनास्थळी दाखल झाले. त्यांनंतर रक्ताच्या थारोळ्यात पडलेला गजानन पोलिसांना दिसला. गजानन हा मूळचा हिंगोलीचा असून तो बारामतीत एका केशकर्तनालयाच्या दुकानात (Barber shop) काम करत होता. अत्यंत निर्दयी पद्धतीने कात्रीचे वार करून हा खून करण्यात आला.

पोलिसांना आला संशय

गजाननबरोबरच त्याचा मावसभाऊ संतोष गुळमूळे हादेखील काम करतो. मात्र संतोष हा सतत दारूच्या नशेत असतो, ही माहिती पोलिसांना मिळाली. सीसीटीव्ही फुटेजमध्ये तो येथून जाताना दिसल्यानंतर पोलिसांना संशय आला. तोपर्यंत बारामती तालुका पोलिसांच्या याच कल्पनेनुसार संतोष गुळमुळे हा खरोखरच पळून जाण्याच्या तयारीत कटफळ रेल्वे स्थानकावर रेल्वेची वाट पाहत असल्याचे निदर्शनास आले. इतक्यात पोलिसांनी त्याची ओळख पटवून त्याला पकडले. त्याच्याकडे अधिक चौकशी केली असता त्याने खुनाची कबुली दिली आहे.

निर्घृण पद्धतीने खून

वारंवार नशेत राहण्याबद्दल विचारणा केल्याने आपण त्याला मारणार, असे संतोष सतत म्हणत होता, अशी माहिती गजानन याच्या पत्नीने पोलिसांना दिली. त्यावरून पोलिसांनी अधिक तपास केला असता संतोष याने सख्ख्या मावसभावाचा केवळ राग म्हणून खून केला. एवढेच नाही, तर अतिशय निर्घृण पद्धतीने त्याने हे कृत्य केल्याचे उघड झाले आहे. दरम्यान, पोलिसांनी आरोपीला ताब्यात घेतला आहे. आरोपी संतोष आणि मृत गजानन या दोघांचे आधी कधी भांडण झाले होते का, त्यांच्यात इतर काही वाद होते, का या सर्वांच्या दृष्टीन पुढील कारवाई आणि तपास तालुका पोलीस करीत आहेत.