jayant patil : राष्ट्रवादीला धक्का, जयंत पाटील यांच्या अडचणी वाढणार, निकटवर्तींना ईडीची नोटीस

पुणे | 13 ऑगस्ट 2023 : राष्ट्रवादी काँग्रेसमधील बंडानंतर शरद पवार आणि अजित पवार यांच्यात शनिवारी गुप्त भेट झाली. या भेटी दरम्यान अजित पवार यांच्याकडून शरद पवार यांना सत्तेत सहभागी होण्याचा प्रस्ताव दिल्याची चर्चा आहे. दोन नेत्यांमधील ही भेट जयंत पाटील यांच्या माध्यमातून झाली. या भेटीबाबत अत्यंत गुप्तता पाळली गेली होती. या भेटीसंदर्भात चर्चा सुरु आहेत. त्याचवेळी राष्ट्रवादीतील शरद पवार गटाचे प्रदेशाध्यक्ष जयंत पाटील यांच्या अडचणी वाढल्या आहे. त्यांच्या निकटवर्तींना ईडीची नोटीस आलीय.

जयंत पाटील अडचणीत

जयंत पाटील यांची यापूर्वीच ईडीकडून चौकशी झाली होती. जयंत पाटील यांची 22 मे 2023 रोजी तब्बल साडे नऊ तास चौकशी करण्यात आली होती. IL अँड FS कंपनीच्या आर्थिक गैरव्यवहाराप्रकरणात ही चौकशी झाल्याचे म्हटले जात होते. आता अजित पवार यांच्या गटात न गेलेले जयंत पाटील यांच्या निकटवर्तींना ईडीची नोटीस आली आहे. जयंत पाटील यांचे बंधू जयसिंगराव पाटील यांना ईडीने नोटीस पाठवली आहे.

कोण आहेत जयसिंगराव पाटील

जयसिंगराव पाटील यांचे हॉटेलचा व्यवसाय आहे. मुंबईत त्यांचे हॉटेल आहेत. जयसिंगराव पाटील यांच्यासोबत जयंत पाटील यांच्या जवळच्या नातेवाईकांनाही ईडीकडून नोटीस आली आहे. यामुळे जयंत पाटील यांच्यासमोरील अडचणी वाढणार आहे.

काल झाली होती बैठक

अजित पवार आणि शरद पवार यांची गुप्त बैठक 12 ऑगस्ट रोजी झाली होती. ही बैठक घडवून येण्यामागे जयंत पाटील होते. पुणे शहरातील चांदणी चौकातील पुलाचा उद्घाटन कार्यक्रम झाल्यानंतर ही बैठक झाली. चांदणी चौकातील कार्यक्रम झाल्यानंतर अजित पवार ताफा सोडून कोरेगाव पार्क येथील उद्योगपती अतुल चोरडिया यांच्या निवासस्थानी झाली. या बैठकीत जयंत पाटील उपस्थित होते.

कोण आहेत अतुल चोरडिया

अतुल चोरडिया हे पवार परिवार परिवाराचे मित्र आहे. यामुळे ही गुप्त बैठक हॉटेलमध्ये ठेवण्याऐवजी त्यांच्या निवासस्थानी ठेवली. परंतु त्यानंतरही या बैठकीची बातमी माध्यमांना मिळाली. त्यानंतर या विषयाची राजकीय चर्चा जोरात सुरु आहे.