Sangli District Central Cooperative Bank Election : टप्प्यात आणून करेक्ट कार्यक्रम केला, गोपीचंद पडळकर यांची खोचक टीका; निकाल लागताच कुणाला डिवचलं?

सांगली जिल्हा मध्यवर्ती बँकेच्या निवडणुकीचा निकाल लागताच भाजपचे आमदार गोपीचंद पडळकर यांनी शरद पवार गटाचे आमदार जयंत पाटील यांच्यावर खोचक टीका केली आहे. जतच्या जनतेने टप्प्यात आणून करेक्ट कार्यक्रम केला, अशी खोचक टीका भाजप आमदार गोपीचंद पडळकर यांनी आमदार जयंत पाटील यांच्यावर केली आहे. जिल्हा मध्यवर्ती बँकेच्या निवडणुकीमध्ये गोपीचंद पडळकर यांचा एकतर्फी विजय झाला आहे. या निवडणुकीत पडळकर 54 मतांनी विजयी झाले आहेत. त्यानंतर त्यांनी ही खोचक प्रतिक्रिया दिली आहे.

सर्वपक्षीय निवडणूक होताना गोपीचंद पडळकर यांच्यासह सहा जागांवर निवडणूक झाली होती. त्यामध्ये गोपीचंद पडळकर यांच्या जत सोसायटी गटातील निवडणुकीकडे संपूर्ण राज्याचे लक्ष लागून राहिलं होतं. अखेर पडळकर यांनी या निवडणुकीमध्ये महाविकास आघाडीच्या विनोद पवार यांचा दारुण पराभव करत जिल्हा बँकेत एन्ट्री केली आहे. त्यावर त्यांनी ही प्रतिक्रिया व्यक्त केली आहे. हा गावगाड्यातील गोरगरीबांचा विजय आहे. आपल्या गावातील मुलगा बँकेत गेला पाहिजे, असं लोकांना वाटत होतं. त्यामुळे मतदारांनी मला मतदान केलं. मदत केली. त्यामुळे या विजयाचं श्रेय या सर्वांना जातं, असं गोपीचंद पडळकर म्हणाले.

सहावेळा कोर्टात गेले, आता परत…

सहावेळा या निवडणुकीत ते कोर्टात गेले. कोर्टाने त्यांना दाद लागू दिली नाही. सहावेळा कोर्टात जायला असं काय आहे? आता म्हणतात ते निकालानंतर कोर्टात जाणार आहे. कोर्टात जायला असं काय आहे. तुमच्या स्वत:च्या बँका आहेत. ठेवी ठेवताना तुमच्या बँकेत ठेवायच्या आणि कर्ज मात्र जिल्हा बँकेतून घ्यायचं हे चालणार नाही. आम्ही सर्व प्रकरणं तपासणार आहोत. कारखान्याला पैसे देण्याबाबत दुमत नाही. पण बुडवायचे कशाला? असा सवाल पडळकर म्हणाले.

राजकारणाचा अड्डा झाला

जिल्ह्याचं राजकारण या बँकेतून केलं जात होतं. ही नुसता सहकारी बँक नव्हती. तर जिल्ह्याच्या राजकारणाचा अड्डा झाला होता. कारखाने किती विकले? मी आलो तर सहकाराला अडचण येईल सांगत होते. तुम्ही काय काम केलं? असा सवाल त्यांनी केला. जिल्हा बँकेंच्या कर्मचाऱ्यांचा पगार वाढला पाहिजे, तरुणांसाठी, विद्यार्थ्यांसाठी योजना आणल्या पाहिजे, असं सांगतानाच सदाभाऊ खोत आणि आम्ही जिल्हा बँकेचं धोरण ठरवणार आहोत. एक दोन लोकांचा फायदा होऊ देणार नाही. मनमानी होऊ देणार नाही, असं त्यांनी स्पष्ट केलं.