Rohit Pawar : MPSC चे अध्यक्ष विवेक भीमनवार यांच्या राजीनाम्याबद्दल रोहित पवार यांचा मोठा गौप्यस्फोट, त्यांनी मुख्यमंत्र्यांकडे राजीनामा पाठवलाय पण..
Rohit Pawar : पुण्यामध्ये सध्या MPSC विद्यार्थ्यांचं आंदोलन सुरु आहे. MPSC चे अध्यक्ष विवेक भीमनवार यांच्या राजीनाम्याची मागणी केली जात आहे. आता या विषयात रोहित पवार यांनी मोठा गौप्यस्फोट केला आहे.
प्रदीप कापसे, प्रतिनिधी : महाराष्ट्र लोक सेवा आयोगाचे वर्तमान अध्यक्ष विवेक भीमनवार यांच्या राजीनाम्याबद्दल रोहित पवार यांनी मोठा गौप्यस्फोट केला आहे. “नैतिकता लक्षात घेता, विद्यार्थ्यांचं आंदोलन बघता नाव खराब झालेलं आहे. पेपर विवेक भीमनवार यांच्या काळात फुटला. नैतिकता न दाखवल्यामुळे त्यांच्याबद्दल वाईट वातावरण तयार झालेलं आहे. त्यांनी मुख्यमंत्र्यांना राजीनामा पाठवलेला आहे. विषय इतकाच आहे की, भीमनवारांनी मुख्यमंत्र्यांना राजीनामा पाठवून काही होणार नाही. तो राजीनामा राज्यपालांना देणं गरजेचं होतं. त्यांनी विषय पूर्णपणे मुख्यमंत्र्यांच्या कोर्टात टाकलेला आहे. पण मुख्यमंत्र्यांसमोर प्रश्न हा आहे की, जर भीमनवारांचा राजीनामा घेतला, तर सामान्य माणसं कोणाचाही राजीनामा मागतील. उद्या मुख्यमंत्र्यांचाही राजीनामा मागितला जाऊ शकतो. आता हा सर्व इगोचा खेळ झालाय” असा दावा रोहित पवार यांनी केला.
“एकाबाजूला मित्राला वाचवायचं, दुसरीकडे इगो मेन्टेन करायचा. लाखो विद्यार्थ्यांचं भविष्य, स्वप्न का मारली जातायत?. महाराष्ट्रातल्या तेरा ते साडेतेरा कोटी लोकांचं चांगल्या प्रशासनाचं स्वप्न का मारलं जातय? मुख्यमंत्र्यांच्या इगोमुळे. भीमनवार मुख्यमंत्र्यांचे जीवलग मित्र आहेत. राज्यपालांकडे त्यांचा राजीनामा गेला पाहिजे होता. भीमनवारांनी कदाचित त्यांची खेळी खेळली असावी. मी याच्यामध्ये नाहीय. मी राजीनामा तुम्हाला पाठवतोय. हा राजीनामा मी राज्यपालांकडे पाठवू की काय करु, तुम्ही ठरवा” असा दावा रोहित पवार यांनी केला.
भीमनरावांनी शॉर्टकर्ट काढला
“मुख्यमंत्र्यांना आता हे ठरवायचय की, लाखो विद्यार्थ्यांचं, महाराष्ट्राच्या जनतेचं भविष्य महत्वाचं आहे की, इगो आणि मैत्री. राजीनामा मुख्यमंत्र्यांकडे देऊन चालत नाही, तो राज्यपालांकडे पाठवावा लागतो. भीमनरावांनी शॉर्टकर्ट काढला, त्यांनी थेट मुख्यमंत्र्यांना राजीनामा पाठवला. माझ्याकडे माहितीय त्यानुसार त्यांनी मुख्यमंत्र्यांवर दबाव वाढवला आहे. आता मुख्यमंत्र्यांना ठरवायचय की, मित्राला वाचवायचं की इगो मेन्टेन करायचा की विद्यार्थ्यांच्या मागण्या मान्य करायच्या” असं रोहित पवार म्हणाले.
राज्यपालांकडे राजीनामा दिला पाहिजे
“या संस्थेपासून लांब होण्यासाठी, विद्यार्थ्यांचा रोष घेण्याची भीमनवारांची इच्छा नाहीय. त्यांनी मित्राकडे राजीनामा दिला आहे. खरंतर मित्राकडे राजीनामा देऊन काय होणार, राज्यपालांकडे राजीनामा दिला पाहिजे. मुख्यमंत्री काय करतायत, मित्राला वाचवातयात, स्वत:च्या इगोला ताकद देतायत आणि राज्यातल्या विद्यार्थ्यांचं भवितव्य कुठेतरी अडचणीत आणतायत” असा आरोप रोहित पवारांनी केला.
