Sachin Ahir : मोठी बातमी, एकनाथ शिंदेंकडून पुन्हा उद्धव ठाकरेंचा गेम, सचिन अहिर फुटले

महाराष्ट्राच्या राजकारणात आज पुन्हा एकदा एक मोठी घडामोड घडली आहे. आठ दिवसात शिवसेना मुख्य नेते एकनाथ शिंदे यांनी उद्धव ठाकरे यांना पुन्हा मोठा राजकीय धक्का दिला आहे.शिंदे सेनेने ठाकरे गटाला दिलेला हा दुसरा मोठा धक्का आहे. उद्धव ठाकरे यांचे निकटवर्तीय म्हणून ओळखले जाणारे सचिन अहिर फुटले आहेत. ठाकरे गटाने त्यांना विधान परिषदेवर पाठवलं होतं. सचिन अहिर यांनी विधानसभेत वरळी मतदारसंघाचं प्रतिनिधीत्व केलं आहे. खासदार फुटल्यानंतर उद्धव ठाकरे यांना दुसरा मोठा राजकीय झटका बसला आहे. विधान परिषदेचे आमदार सचिन आहिर फुटले असून त्यांनी एकनाथ शिंदे यांच्या शिवसेनेत प्रवेश केला आहे. त्यांना विधान परिषदेचं उपसभापती देण्यात आलं आहे.

सचिन अहिर हे वरळी विधानसभेचे आमदार आदित्य ठाकरे यांच्यासोबत सतत सावलीसारखे दिसायचे. ठाकरे कुटुंबाचे निकटवर्तीय म्हणून त्यांनी ओळख निर्माण केली होती. पण सध्याच्या पक्षांतराच्या लाटेत त्यांनी कठीण काळात उद्धव ठाकरे यांची साथ सोडली आहे. सचिन अहिर हे मूळचे राष्ट्रवादी काँग्रेस पक्षाचे. शरद पवार यांनी त्यांची राजकीय कारकीर्द घडवण्यात महत्वाची भूमिका बजावली. राष्ट्रवादी काँग्रेस पक्षाने त्यांना मंत्रि‍पद, मुंबई अध्यक्षपद अशा विविध जबाबदाऱ्या दिल्या. अरुण गवळी यांचा भाचा अशी सचिन अहिर यांची ओळख होती. दक्षिण मुंबईचा भाग हा गिरणगाव म्हणून ओळखला जातो. इथे अनेक मिल्स होत्या. त्या मिल्सच्या युनियनच्या माध्यमातून काम करताना कामगार क्षेत्रातून सचिन अहिर यांनी राजकारणात प्रवेश केला.

ठाकरे गटातील अस्वस्थतता पुन्हा आली समोर

सचिन अहिर विधान परिषदेच्या उपसभापतीपदाचा अर्ज दाखल करत असताना तिथे मुख्यमंत्री देवेंद्र फडणवीस, दोन्ही उपमुख्मयंत्री सुनेत्रा पवार आणि एकनाथ शिंदे तिथे उपस्थित होते. खासदार फुटल्यानंतर आमदारही फुटणार अशी चर्चा होती. आता सचिन अहिर यांच्या रुपाने ठाकरे गटाच्या आमदारांच्या मनात असलेली अस्वस्थतता समोर आली आहे. 2014 विधानसभा निवडणुकीत सचिन अहिर यांचा आमदार सुनील शिंदे यांनी पराभव केला. 2019 मध्ये आदित्य ठाकरे यांनी वरळीमधून विधानसभेची निवडणूक लढवली. त्यावेळी सचिन अहिर यांनी शिवसेनेत प्रवेश केला. आदित्य ठाकरे निवडून आल्यानंतर शिवसेनेने सुनील शिंदे आणि सचिन अहिर या दोघांना विधान परिषदेवर पाठवण्यात आलं.