आंबे का उचलले? औरंगाबादच्या बिबी का मकबऱ्यात पर्यटकांना बेदम मारहाण; पर्यटकांमध्ये भीती

औरंगाबाद : औरंगाबादमध्ये दररोज शेकडो पर्यटक बिबी का मकबरा पाहायला येतात. प्रति ताजमहल म्हणून बिबी का मकबरा प्रसिद्ध आहे. त्यामुळे ताजमहल बघायला जाता येत नाही म्हणून लोक बिबी का मकबरा पाहायला येतात. राज्याच्या कानाकोपऱ्यातून हे लोक येत असतात. मकबऱ्याची प्रत्येक भिंत न्यायहळत असतात. तसेच मकबऱ्याजवळ फोटोही काढत असतात. त्यामुळे सकाळपासून संध्याकाळपर्यंत मकबरा परिसर पर्यटकांनी नेहमीच गजबजलेला असतो. मात्र, काल मकबऱ्यात अत्यंत धक्कादायक प्रकार घडला. मकबऱ्यात काही पर्यटकांना बेदम मारहाण करण्यात आली आहे. क्षुल्लक कारणावरून ही मारहाण करण्यात आल्याने संताप व्यक्त केला जात आहे. या प्रकरणी संबंधितांवर कारवाई करण्याची मागणी केली जात आहे.

औरंगाबादच्या प्रसिद्ध मकबरा परिसरात पर्यटकांना बेदम मारहाण करण्यात आली आहे. आंबे का उचलले? म्हणत मारहाण करण्यात आली आहे. आधी या पर्यटकांना बीबी का मकबऱ्यात आतमध्ये बेदम मारहाण करण्यात आली. त्यानंतर परत बाहेर आणून या चार पर्यटकांना बेदम चोप देण्यात आला आहे. मकबरा परिसरातील आंब्याचे कंत्राट घेतलेल्या लोकांकडून ही मारहाण करण्यात आली आहे. आंब्याच्या कंत्राट घेणाऱ्या लोकांकडून पर्यटकांशी नेहमीच अरेरावी केली जात असल्याची स्थानिकांची तक्रार आहे. या मारहाण करणाऱ्यांवर कारवाई करण्याची मागणी करण्यात येत आहे. तसेच या प्रकारावर पर्यटकांमधून संताप व्यक्त केला जात आहे.

सुरक्षेची मागणी

मकबऱ्यातील आंब्याचे कंत्राट घेणाऱ्याच्या माणसांची दादागिरी वाढली आहे. आधी अरेरावी करणाऱ्यांची मजल आता मारहाणीपर्यंत गेली आहे. पर्यटकांवर हात उचलणे अत्यंत चुकीचं आहे. यावरून सर्वच पर्यटकांमध्ये भीतीचं वातावरण निर्माण झालं आहे. त्यामुळे या आंब्याच्या कंत्राटदाराच्या माणसाला आवर घालण्यात यावा, त्यांच्यावर कारवाई करण्यात यावी आणि इथे येणाऱ्या पर्यटकांना संरक्षण पुरवण्यात यावं अशी मागणी करण्यात आली आहे. तसेच या कंत्राटदाराच्या माणसांना मकबरा परिसरातून हाकलून देण्याची मागणीही करण्यात येत आहे. या प्रकरणात पोलिसांनी स्वत:हून लक्ष घालण्याची मागणीही पर्यटकांमधून होत आहे.

पर्यटनाला यायचे की नाही?

कालच्या प्रकारावर काही पर्यटकांनी तर संताप व्यक्त केला आहे. बिबी का मकबरा हे पर्यटन स्थळ आहे. पर्यटकांनी या स्थळाला भेट द्यावी म्हणून ते उघड करण्यात आलं आहे. कंत्राटदाराच्या आंब्याच्या सोयीचं बिबी का मकबरा हे केंद्र नाहीये. त्यामुळे या परिसरातून कंत्राटदाराला समज देऊन हुसकावून लावलं पाहिजे. अशा पद्धतीने जर पर्यटकांना मारहाण होत असेल तर आम्ही पर्यटनाला यायचे की नाही? असा सवाल पर्यटक करत आहेत.