भोंदू अशोक खरात प्रकरणात सुषमा अंधारे आक्रमक, थेट नाशिक पोलिस आयुक्तांच्या भेटीला..

नाशिकचा भोंदूबाबा अशोक खरात याचे एका मागून एक कारनामे पुढे येत आहेत. यादरम्यानच आता नाशिकच्या पोलिस आयुक्तांची भेट सुषमा अंधारे, रूपाली ठोंबरे आणि संगिता तिवारी यांनी घेतली आहे. या भेटीनंतर बोलताना सुषमा अंधारे यांनी म्हटले की, या प्रकरणात त्यांनी एफआयआर नोंदवून घेतली आहे. पण त्यांनी त्यांच्याकडे असलेली सर्व कागदपत्रे एसआयटीकडे वर्ग केली आहेत. आयओ देखील तिकडे गेले आहेत. या प्रकरणातील तपासाची जी काही गती आहे आणि आमचे जे प्रश्न आहेत, त्याचे उत्तरे ती सर्व एसआयटीसोबत चर्चा केल्यानंतर मिळू शकतात, त्यामुळे कदाचित मी तुम्हाला इतके काही ठोस सांगू शकत नाही, असे पोलिस आयुक्तांनी सांगितले. सध्या आमचे त्यांच्यासोबत अत्यंत प्राथमिक बोलले झालेले आहे. तपास सगळा एसआयटीकडे वर्ग करण्यात आला आहे, त्यामुळे त्यांना त्यावर काहीही भाष्य करता येणार नाहीये. ते अगोदर एसआयटीसोबत चर्चा करतील आणि त्यानंतर ते उत्तरे देऊ शकतात.

यादरम्यान रूपाली ठोंबरे यांनी रूपाली चाकणकर यांना अटक करण्यात यावे, अशीही मागणी केली. सुषमा अंधारे  आणि रूपाली चाकणकर या प्रकरणात आक्रमक भूमिका घेताना दिसत आहे. सुषमा अंधारे यांनी व्हायरल झालेल्या व्हिडीओनंतर थेटपणे रूपाली चाकणकर यांच्या राज्य महिला आयोगाच्या अध्यक्षपदाच्या राजीनाम्याची मागणी केली होती.

आता पुन्हा एकदा सुषमा अंधारे या प्रकरणात आक्रमक भूमिका घेताना दिसत आहेत. सुषमा अंधारे यांनी म्हटले की, आम्ही लवकरच एसआयटी पथकाची भेट घेणार आहोत. चाकणकर यांना अटक करण्यासाठी पोलिस आयुक्तांना निवेदनही देण्यात आले. भोंदू अशोक खरात प्रकरणात सातत्याने रूपाली चाकणकर यांचे नाव घेत आहे.

रूपाली चाकणकर भोंदू अशोक खरात याचे पाय धुताना देखील दिसल्या होत्या, त्यांच्या या व्हायरल व्हिडीओनंतर राज्यात खळबळ उडाली आणि त्यांच्या राजीनाम्याची मागणी सातत्याने केली जात होती. त्यानंतर त्यांनी उपमुख्यमंत्री सुनेत्रा अजित पवार यांच्याकडे आपला राज्य महिला आयोग अध्यक्षपदाचा राजीनामा दिला.