मोठी बातमी! एकनाथ शिंदेंच्या बड्या नेत्याचा पाय खोलात; गुन्हा दाखल, नेमकं कारण काय?

जळगावमधून मोठी बातमी समोर आली आहे, चाळीसगाव शहरात रविवारी झालेल्या जनआक्रोश धरणे आंदोलनानंतर शिवसेनेचे नेते आणि माजी खासदार उन्मेश पाटील यांच्यावर गुन्हा दाखल झाला आहे. कालच्या आंदोलनादरम्यान केलेल्या भाषणात चाळीसगाव शहर पोलीस ठाण्यात कार्यरत पोलीस उपनिरीक्षकाविषयी आक्षेपार्ह व अपमानास्पद शब्दांचा वापर केल्यामुळे हा गु्न्हा दाखल करण्यात आला आहे. त्यामुळे आता उन्मेश पाटील यांच्या अडचणीत वाढ झाली आहे. याबाबत सविस्तर माहिती जाणून घेऊयात.

पाटील यांचा PSI वर गंभीर आरोप

उन्मेश पाटील यांनी आपल्या भाषणात एक पोलीस उपनिरीक्षक एका महिला पोलिस कर्मचाऱ्यांकडे शरीर सुखाची मागणी करीत असल्याचा आरोप केला होता. याप्रकरणी त्यांच्यावर अदखलपात्र गुन्हा दाखल करण्यात आला आहे. गुन्हा दाखल झाल्यानंतर उन्मेश पाटील यांनी आज पत्रकार परिषद घेतली. यावेळी पाटील यांनी महिला पोलीस कर्मचाऱ्याकडे शरीर सुखाची मागणी करणाऱ्या पोलीस उपनिरीक्षकावर कायदेशीर कारवाई करण्याची मागणी केली.

आम्ही गुंडांचा बंदोबस्त करणारे आहोत

उन्मेश पाटील यांनी म्हटले की, उद्यापर्यंत पोलिस अधीक्षकांनी यावर कारवाई करावी, अन्यथा विधिमंडळात सभागृहात नेत्यांना सांगून विषय मांडू. पुढे बोलताना पाटील यांनी, स्थानिक आमदाराच्या दबावाखाली पोलीस प्रशासन काम करत असल्याचा आरोप केला. तसेच आम्ही छत्रपतींचे मावळे, आम्हाला संस्कार आहे, आम्ही अधिकाऱ्यांकडून राजकारण करणारे षंड नाही, आम्ही गुंडांचा बंदोबस्त करणारे आहोत असं विधान केलं आहे.

सत्ताधाऱ्यांनी महिलेला न्याय द्यावा

पुढे बोलताना पाटील यांनी, ‘रायगडला वारी म्हणून येणारे तुम्ही जर मावळे असाल तर चाळीसगावच्या त्या महिलेला न्याय मिळवून द्या’ असे आव्हान उन्मेष पाटील यांनी भाजपा आमदार मंगेश चव्हाण यांना दिले आहे. ‘आमदार मंगेश चव्हाण सत्ताधाऱ्यांच्या जवळचे आहेत, मग महिलेला न्याय द्या, फक्त बोगस काम करण्यासाठी जवळचे राहू नका. नुसते कलेक्शन करायला तुम्हाला ठेवलं नाही,’ असा टोला देखील उन्मेष पाटील यांनी लगावला आहे. दरम्यान आता गुन्हा दाखल झाल्याने आता उन्मेश पाटील यांच्यावर नेमकी काय कारवाई होणार हे पाहणे महत्त्वाचे ठरणार आहे.