काँग्रेसला मोठा धक्का; या नेत्याचा भाजपात कार्यकर्त्यांसह प्रवेश, सोलापूरच्या राजकारणात खळबळ

सोलापूरातील करमाळा तालुक्यात काँग्रेस पक्षाला गळती लागली असून काँग्रेसचे तालुकाध्यक्ष प्रताप जगताप यांनी समर्थकांसह भारतीय जनता पार्टीत ( भाजप ) अधिकृत प्रवेश केला आहे. काँग्रेसचे ज्येष्ठ नेते माजी मुख्यमंत्री सुशीलकुमार शिंदे आणि खासदार प्रणिती शिंदे यांना हा मोठा धक्का मानला जात आहे. करमाळ्यातील या घडामोडींने काँग्रेसच्या कार्यकर्त्याचे मनोबल कमजोर झाल्याचे म्हटले जात आहे.

सोलापूर येथील करमाळा काँग्रेसला मोठे खिंडार पडले आहे. काँग्रेसचे तालुकाध्यक्ष प्रताप जगताप यांनी त्यांच्या समर्थकांसह भारतीय जनता पार्टीत (भाजप) अधिकृत प्रवेश केल्याने खळबळ उडाली आहे. माजी खासदार रणजीतसिंह नाईक निंबाळकर आणि भाजपचे सोलापूर ग्रामीण जिल्हाध्यक्ष गणेश चिवटे यांच्या प्रमुख उपस्थितीत आणि नेतृत्वाखाली हा पक्षप्रवेश पार पडला आहे. गणेश चिवटे यांनी सोलापूर ग्रामीण जिल्हाध्यक्षपदाची सूत्रे हाती घेतल्यानंतर अवघ्या काही दिवसांतच काँग्रेसच्या तालुका अध्यक्षांना पक्षात आणत भाजपने करमाळ्यात मोठी ताकद निर्माण केली आहे. या राजकीय घडामोडीमुळे भाजपची स्थानिक पातळीवरील पकड अधिक मजबूत झाली असल्याचे मानले जात आहे.