‘राष्ट्रवादीच्या मंत्र्यांसोबत बसल्याने उलट्या होतात’, तानाजी सावंत यांचा आधी निशाणा, आता…, महायुतीत काय घडतंय?

शिवसेना नेते आणि राज्याचे आरोग्य मंत्री तानाजी सावंत यांनी केलेल्या वक्तव्यामुळे महायुतीत ठिणगी पडली आहे. मंत्रिमंडळ बैठकीत राष्ट्रवादी काँग्रेसच्या मंत्र्यांसोबत बसल्यानंतर बाहेर आल्यावर आम्हाला उलट्या होतात, असं वक्तव्य तानाजी सावंत यांनी भर सभेत केलं आहे. त्यांच्या या वक्तव्यावरुन महायुतीत मोठा वाद निर्माण झाला आहे. राष्ट्रवादी काँग्रेस मुख्य प्रवक्ते उमेश पाटील यांनी तानाजी सावंत यांच्या या वक्तव्यावरुन उपमुख्यमंत्री अजित पवार यांना थेट सत्तेतून बाहेर पडण्याचं आवाहन केलं आहे. तर दुसरीकडे शिवसेना नेते भरत गोगावले यांनी तानाजी सावंत यांचं वक्तव्य बरोबर नसल्याचं म्हणत कान टोचले आहेत. तानाजी सावंत यांच्या वक्तव्यावरुन महायुतीत वाद उफाळल्यानंतर त्यांनी याविषयी फार बोलणं टाळलं आहे.

तानाजी सावंत धाराशिवच्या वाशी तालुक्यातील सारोळा मांडवा येथे आले असता प्रसारमाध्यमांच्या प्रतिनिधींनी त्यांच्याशी संवाद साधण्याचा प्रयत्न केला. पण तानाजी सावंत यांनी माध्यमांशी बोलण्यास नकार दिला. “माझा इतर वेळ कमी असतो. मला भेटू दे लोकांना”, असं तानाजी सावंत म्हणाले. यानंतर ते पुढच्या कार्यक्रमासाठी रवाना झाले.

तानाजी सावंत यांचं वादग्रस्त वक्तव्य काय?

“काँग्रेस, राष्ट्रवादीचं आणि माझं कधी जमलेलं नाही. हे वास्तव आहे. कारण ते विचार परिपूर्ण अंगात भिनलेले आहेत. त्यामुळे ते शक्य आहे. आज जरी आम्ही कॅबिनेटला मागे राहून बसलो असलो तरी बाहेर जावून आम्हाला उलट्या होतात. सहन होत नाही. ते आता वयाच्या 60 व्या वर्षी माणूस बोलू शकत नाही”, असं वक्तव्य तानाजी सावंत यांनी केलं. याच वक्तव्यावरुन राष्ट्रवादीकडून त्यांच्यावर आता टीका केली जात आहे.

राष्ट्रवादीच्या सुनील शेळके यांचा पलटवार

मंत्री तानाजी सावंतांना उत्तर देताना अजित पवार गटाचे आमदार सुनील शेळकेंनी चांगलाच पलटवार केला. “अजित पवारांची राष्ट्रवादी महायुतीच्या सत्तेत आल्यापासून तानाजी सावंतांच्या पोटात नेमकं काय गेलंय हे माहीत नाही. त्यांना जे बोलायचं ते बोलून घेऊ द्यात. आगामी विधानसभा निवडणुकीत कोण-कोणाच्या मांडीवर बसतं अन कोणाची गरज कोणाला आहे, हे लक्षात येईल”, असं प्रत्युत्तर सुनील शेळके यांनी दिलं.