Virar News : धक्कादायक, मुलाला बरं करण्याचं आमिष दाखवून विरारच्या रिसॉर्टमध्ये आरोपीचं मुलाच्या आईसोबत नको ते कृत्य

विरारमध्ये एक धक्कादायक घटना घडली आहे. एका अल्पवयीन गतिमंद मुलाला बरं करण्याचं स्वप्न दाखवून महिलेवर अत्याचार केला. पीडित महिलेचा मुलगा गतीमंद आहे. तांत्रिकाकडे नेऊन तंत्र-मंत्राने मुलगा बरा होईल असं तिला सांगण्यात आलं. महिलेच्या अधश्रद्धेचा फायदा उचलून तिला आरोपीने तिचा विश्वास संपादन केला. अजय कमलाकर राऊत असं आरोपीचं नाव आहे. आरोपीने महिलेला मुलाला बरं करण्याचा शब्द दिला होता. महिलेच्या अंधश्रद्धेचा फायदा उचलत अजय राऊतने तिच्याशी जवळीक वाढवली. महिलेला अर्नाळा येथील एका रिसॉर्टमध्ये बोलवून तिला शरीरसंबंध ठेवण्यासाठी भाग पाडलं. अजयला दोन दिवसाची पोलीस कोठडी दिली होती. वसई न्यायालयात हजर केलं असता आरोपीला 14 दिवसांची न्यायालयीन कोठडी सुनावण्यात आली आहे.

वसई किल्ल्यातील भोंदू बाबा अजय राणाचं नाव या प्रकरणात समोर आलं आहे. त्याच्याकडे नेवून मदत करण्याच्या बहाण्याने पीडित महिलेवर लैंगिक अत्याचार केल्याचं उघड झालं आहे. अजय राणा हा वसई किल्ला परिसरात मंत्र-तंत्राद्वारे लोकांवर उपचार करतो. त्याच्याकडे आरोपी पीडित महिलेला घेऊन जाणार होता. या अजय राणा भोंदू मांत्रिका विरुद्ध याआधी एका तरुणीला जीवन संपवण्यासाठी प्रवृत्त केल्याप्रकरणी वसई पोलीस ठाण्यात गुन्हा दाखल आहे. अर्नाळा सागरी पोलीस ठाण्याचे वरिष्ठ पोलीस निरीक्षक सतीश निकम यांच्या मार्गदर्शनाखाली या प्रकरणाचा तपास सुरु आहे.

पीडित महिलेची आर्थिक फसवणूक झाली आहे का?

या गुन्ह्यात अजय राणाचा किती सहभाग आहे? पीडित महिलेची आर्थिक फसवणूक झाली आहे का? अशाच प्रकारे अंधश्रद्धेचे जाळे पसरवून आणखी कोणाचे शोषण करण्यात आले आहे का? या अंगाने पोलीस तपास करत आहेत. याबाबत अर्नाळा सागरी पोलीस ठाण्यात पीडित महिलेच्या तक्रारीवरून भारतीय न्याय संहिता २०२३ चे कलम 64(1),69, 75, 78 प्रमाणे गुन्हा दाखल करण्यात आला आहे.

याआधी सुद्धा असे गुन्हे घडले आहेत. नाशिकच्या अशोक खरातचं प्रकरण सर्वांनाच माहित आहे. त्याने कशाप्रकारे महिलांवर अत्याचार केला. महिलांच्या भाबडेपणाचा फायदा उचलून असे गुन्हे केले जातात.