‘या ठिकाणी तुमची मुलगी असती तर?’, महिलेचा गिरीश महाजन यांना सवाल, बदलापूर रेल्वे स्थानकावर राडा

बदलापूरच्या रेल्वे स्थानकावर नागरिकांकडून प्रचंड रोष व्यक्त केला जातोय. बदलापूरच्या एका नामांकीत शाळेत साडेतीन वर्षांच्या दोन चिमुरडींवर शाळेतील सफाई कर्मचाऱ्याने लैंगिक अत्याचार केला. संबंधित घटना या 13 आणि 14 ऑगस्टला घडल्या. या प्रकरणी पोलिसांनी गुन्हा दाखल करुन घेण्यास 12 तास उशिर केल्याचा आरोप केला जातोय. मनसेच्या पदाधिकाऱ्यांनी पोलिसांना इशारा दिल्यानंतर या प्रकरणात गुन्हा दाखल झाला. या घटनेमुळे संपूर्ण बदलापुरात संताप व्यक्त केला जातोय. संतप्त आंदोलकांनी बदलापूर रेल्वे स्थानकावर येत संपूर्ण रेल्वे स्थानक जाम केलं आहे. आंदोलकांनी गेल्या 8 तासांपासून बदलापूर रेल्वे स्थानक आणि रेल्वे सेवा ठप्प केली आहे. जिल्हाधिकाऱ्यांपासून अनेक बड्या अधिकाऱ्यांनी आंदोलकांना आंदोलन मागे घेण्याचं आवाहन केलं. पण आंदोलक ऐकून घेण्याच्या मनस्थितीत नाहीत. आंदोलकांचा आक्रोश पाहता राज्याचे ग्रामविकास मंत्री गिरीश महाजन बदलापूर रेल्वे स्थानकावर दाखल झाले. यावेळी एका महिलेने गिरीश महाजन यांना खोचक प्रश्न विचारला. या ठिकाणी जर तुमची मुलगी असती तर तुम्ही शांत बसला असता का? असा सवाल महिलेने केला.

“मुलगी कुणाचीही असो, असा कायदा आहे का आरोपीला लोकांच्या हवाल्यात देवून त्याला संपवून टाकावं? कुणाकडून काहीही बोललं गेलं तरी मला त्याचा राग नाही. माझी तुम्हाला विनंती आहे, तुमचा राग हा बरोबर आहे. आरोपीला कठोरात कठोर कारवाई केली जाईल. तुम्ही आंदोलन मागे घ्या”, अशी विनंती गिरीश महाजन यांनी केली.

‘जोपर्यंत फाशीची शिक्षा लाईव्ह दिसत नाही….’

यावेळी आणखी एक महिला गिरीश महाजन यांच्याजवळ आली. या महिलेने आरोपीला इथे बदलापूर रेल्वे स्थानकावर आंदोलकांच्या हाती द्यावं, अशी मागणी महिलेने केली. आरोपीला लाईव्ह फाशीची शिक्षा देण्यात यावी, अशी मागणी महिलेने केली. चिमुरडींसोबत झालेला प्रकार किती भयानक आहे. त्या प्रकाराची आपण कल्पनादेखील करु शकत नाही. त्यामुळे आरोपीला फाशीची शिक्षा व्हावी, अशी मागणी महिलेने केली.

‘असा कुठला कायदा आहे का?’; गिरीश महाजनांचा आंदोलकांना सवाल

गिरीश महाजन यांनी आंदोलकांना आंदोलन मागे घेण्याची वारंवार विनंती केली. आरोपीला अशी रेल्वे स्थानकावर लोकांच्या स्वाधिन करुन मारुन टाकावं, असा कुठे कायदा आहे का? असं करुन ताई चालतं का? असा सवाल गिरीश महाजन यांनी केला. आरोपीवर कायदेशीररित्या योग्य ती कारवाई केली जाईल, असं आश्वासन गिरीश महाजन यांनी दिलं. पण आंदोलक ऐकून घेण्याच्या मनस्थितीत नाहीत.