हळदीच्या समारंभात रक्ताचा सडा, दोन गटात तुफान हाणामारी, तिघांचे प्राण गेले
धुळे जिल्ह्यातील साक्री तालुक्यातील पिंपळनेर येथे हळदीच्या समारंभात दोन गटात प्रचंड हाणामारी झाल्याची घटना घडली आहे. यात चाकूने भोसकाभोसकी झाल्याने तिघांचा बळी केला आहे.
अवघ्या उद्यावर आलेल्या विवाहाची धामधुम सुरु असताना हळदीच्या कार्यक्रमात वराकडील मंडळी हास्यविनोदात मग्न असतानाच अचानक या लग्नसमारंभावर अवकळा पसरली. कारण हळदीच्या समारंभातच रक्ताचे पाट वाहिल्याची घटना घडली आहे. दोन गटात बाचाबाची होऊन चाकुने एकमेकांवर वार झाले आणि या हाणामारीत दोघांचा जागीच मृत्यू झाला तर एका जखमीचा धुळ्यातील रुग्णालयात मृत्यू झाल्याने लग्नाच्या मंडपात मातम पसरल्याची घटना घडली आहे.
धुळ्यातील साक्री तालुक्यातील पिंपरळनेर येथे एका विवाहाच्या समारंभाची तयारी सुरु असताना धक्कादायक घटना घडली आहे. उद्यावर आलेला विवाह आणि आज हळदीचा कार्यक्रम सुरु असतानाच अचानक दोन गटात हाणामारी सुरु झाली. आणि त्यात तिघांना चाकूने भोसकण्यात आले. यात दोघांचा पिंपळनेर मध्ये मृत्यू झाला तर एकाचा धुळ्यातील रुग्णालयात नेताना मृत्यू झाल्याने खळबळ उडाली आहे.
लग्न पत्रिकेत नाव न छापल्याने वाद
पिंपळनेर येथील नीळकंठ नगरात गोसावी समाजाचे लग्न कार्य सुरु होते. साखरपुड्याच्या कार्यक्रमाची तयारी सुरु होती. स्थानिक साक्री आणि सोनगड येथून आलेल्या नातेवाईकात आधीपासून काही तरी वाद निर्माण झाले होते. मात्र साखरपुड्याच्या आधी काही नातेवाईकांनी त्यांच्या व्हॉट्सअपवर स्टेटस ठेवून डिवचल्याचे निमित्त झाले. लग्न पत्रिकेत नाव न छापल्याने वाद झाल्याचे म्हटले जात आहे. त्यामुळे संतापलेल्या नातेवाईकांनी धारदार शस्रांनी हल्ला केल्याचे सांगण्यात येत आहे. मात्र,यांच्यात नेमका वाद कसला होता. याची माहिती काही मिळालेली नाही.
एकूण आठ जण जखमी
या हल्ल्यात देवेंद्र ज्ञानेश्वर पवार, सुरेश मोजगीर गोसावी आणि साहिल सुरेश गोसावी यांचा मृत्यू झाला आहे, तर एकूण आठ जण जखमी झाले आहेत. त्यांना लागलीच उपचारासाठी रुग्णालयात दाखल करण्याच्या प्रयत्न करण्यात आला. उपचाराचा दरम्यान तिघांचा मृत्यू झाला आहे. या प्रकरणात पोलिस तपास सुरु असून यशवंत गोपाल गोसावी,अनिल गिरी हटुगिरी गोसावी, सोनुगिरी गोसावी, विजुगिरी हटुगिरी गोसावी, कमलेश गिरी शंभु गिरी गोसावी, हर्षु शंभु गोसावी यांच्यावर आरोप आहेत.
