अशोक खरातला आमदार करण्यासाठी…तृप्ती देसाईंच्या नव्या दाव्याने खळबळ; थेट नाव घेत म्हणाल्या…
मंत्रिपद मिळावे यासाठी भविष्य पाहण्याकरिता नीलम गोऱ्हे यांनी अशोक खरातची भेट घेतली होती, असा दावा केला जातोय. या दाव्यात काहीही तथ्य नसल्याचे गोऱ्हे यांनी सांगितले आहे. आता तृप्ती देसाई यांनी आणखी मोठा दावा केला आहे.
Trupti Desai : भोंदू अशोक खरात प्रकरण सध्या राज्यात चर्चेचा विषय आहे. कित्येक महिलांच्या लैंगिक शोषणाच्या आरोपखाली सध्या तो पोलिसांच्या ताब्यात आहे. त्याला 1 एप्रिलपर्यंत पोलीस कोठडी सुनावण्यात आली आहे. त्याच्याविरोधात एकूण 10 गुन्हे दाखल झाले आहेत. दरम्यान, एकनाथ शिंदे गटाच्या नेत्या नीलम गोऱ्हे यांनी मंत्रिपद मिळावं यासाठी भविष्य पाहण्यासाठी खरातची भेट घेतली होती, असा आरोप भूमाता ब्रिगेडच्या प्रमुख तृप्ती देसाई यांनी केला आहे. नीलम गोऱ्हे यांनी मात्र पत्रकार परिषद घेऊन हा दावा फेटाळला आहे. आता नीलम गोऱ्हे यांच्या पत्रकार परिषदेनंतर तृप्ती देसाई यांनी गोऱ्हे यांच्यावर जोरदार हल्लाबोल केला आहे. नीलम गोऱ्हे खोटं बोलत आहेत, अशी शक्यताही त्यांनी व्यक्त केली.
खरातला भेटलेच नसल्याचा दावा खोटा
नीलम गोऱ्हे या खोटं बोलत आहेत. नीलम गोऱ्हे यांनी अशोक खरात याला हात दाखवला होता. गोऱ्हे यांनी आपलं भविष्य पाहिलं होतं. मात्र मी अशोक खरात यांना भेटलेच नाही असं त्या खोटं बोलत आहेत, असा थेट दावा देसाई यांनी केला आहे. तसेच, पत्रकार परिषदेमध्ये नीलम गोऱ्हे चक्क वाचून दाखवत आहेत. एखाद्या व्यक्तीला आपण भेटलो का नाही हे सांगताना वाचून बोलण्याची काय गरज? असा रोखठोक सवालही त्यांनी केलाय.
खरातला आमदार करण्याची शिफारस तर..
एवढ्या अभ्यासू असलेल्या नीलमताई एवढं खोटं बोलत असतील असं वाटलं नव्हतं, अशी खंतही देसाई यांनी व्यक्त केली. ज्या पद्धतीने नीलम गोऱ्हे या खोटे बोलत आहेत यावरून असं वाटतंय की गोऱ्हे या स्वतःला मंत्रिपद मिळवण्यासाठी आणि अशोक खरातला आमदार करण्याची शिफारस त्यांनी पक्षप्रमुखाकडे केली असेल, असा दावाही त्यांनी केला.
दरम्यान, आता तृप्ती देसाई यांच्या या दाव्यानंतर नीलम गोऱ्हे नेमकं काय प्रत्युत्तर देणार? तृप्ती देसाई आपला दावा खरा असल्याचे सांगताना एखादा पुरावा समोर आणणार का? याकडे सर्वांचे लक्ष लागले आहे.
