शिवसेना कोणाची? खटला सुप्रीम कोर्टात सुरू असताना उद्धव ठाकरेंचं जनतेला मोठं आवाहन

शिवसेना कोणाची, यावरून सुप्रीम कोर्टात सुनावणी सुरू आहे. सुप्रीम कोर्टात सुनावणी सुरू असताना फुटीर खासदार आणि पंतप्रधान नरेंद्र मोदींची भेट झाली. या भेटीवरून ठाकरे गटाने जोरदार हल्लाबोल केला आहे. सुनावणी सुरू असताना फुटीर खासदार आणि पंतप्रधान मोदींची भेटीच्या कार्यक्रमावर ठाकरे गटाने आक्षेप घेतला आहे. या माध्यमातून न्यायालयावर दबाव आणला जात आहे, असा आरोप थेट उद्धव ठाकरेंनी केला आहे. त्यामुळे देशाची लोकशाही वाचवण्याची जबाबदारी जनतेची आहे, असं आवाहनच थेट उद्धव ठाकरे यांनी केलं.

पंतप्रधान मोदी यांनी काल फुटीर खासदारांची भेट घेतल्याने आरोप-प्रत्यारोप सुरू झाले आहेत. खासदार संजय राऊत यांनी या भेटीवरून सत्ताधाऱ्यांवर जोरदार हल्लाबोल केला. त्यानंतर उद्धव ठाकरे यांनीही पंतप्रधान नरेंद्र मोदी आणि भाजपवर टीका केली. उद्धव ठाकरे म्हणाले, ‘एकनाथ शिंदे आधी अमित शहा यांना भेटायचे. आता ते पंतप्रधान नरेंद्र मोदींना भेटत आहे. अमित शहा मुंबईत असताना ते पंतप्रधान मोदींना भेटताहेत. भिऊ नको मी तुझ्या पाठीशी आहे हा धमकी वजा संदेश मोदींनी कुणाला दिला? अमित शहांना, कोर्टाला की फडणवीस यांना दिला? कोर्टाला ही पेपरची कात्रण द्या. वातावरण कसं निर्मिती केली जात आहे हे सांगा’.

‘खरंतर ही लढाई शिवसेनेपुरती नसून गद्दारीचा हा व्हायरस देशभर पसरतेय. पंतप्रधान नरेंद्र मोदींनी इतर पक्षातील गद्दारांनाही हा संदेश दिला का? आमच्याकडे यावे? तुमच्या केसालाही हात लागणार नाही. मी तुमच्या पाठिशी आहे. पीएम मोदींची धमकी कुणाला ? अमित शहा, फडणवीस की कोर्टाला, याचा खुलासा झाला पाहिजे’.

जनतेला आवाहन करताना म्हटलं की, ‘देशात गद्दारीचा व्हायरस पसरत आहे. मी सर्वांना आवाहन करतो, सर्वांनी लोकशाहीसाठी लढलं पाहिजे. देशातील तरुणाचं माथं भडकलं आहे. आता त्यांनी कितीही प्रयत्न केला तरी तरुण ऐकायला तयार नाही. मोदींचं आवाहन गंभीर असून आम्ही कोर्टाच्या लक्षात आणून देणार आहोत. पण मोदींनी कुणाला धमकी दिली. गद्दारांना कुणाची भीती आहे, हे समोर आलं पाहिजे. माझ्या मनातील शंका कळावी म्हणून वाचा फोडत आहे, असे ठाकरेंनी पुढे सांगितले.