पहिल्या पोस्टने खळबळ उडाली असतानाच वाल्मिक कराडच्या मुलाची दुसरी पोस्ट समोर, चर्चेला उधाण

बीड जिल्ह्यातल्या मस्साजोग गावचे सरपंच संतोष देशमुख यांची हत्या करण्यात आली, या घटनेमुळे राज्यभरात मोठी खळबळ उडाली होती. मोठी संतापाची लाट होती, दरम्यान या प्रकरणातील आरोपींना पकडण्यासाठी मोठी आंदोलनं देखील झाली. या प्रकरणात सध्या वाल्मिक कराड हा जेलमध्ये आहे. मात्र दुसरीकडे काही दिवसांपासून त्याच्या मुलाच्या पोस्ट सोशल मीडियावर व्हायरल होत आहेत,  शुक्रवारीच त्याने फेसबुकवर एक पोस्ट केली होती, त्यामध्ये  त्याने ‘आता मात्र सर्वांसमोर सर्व काही बोलणार ‘ असं म्हटलं होतं.  वाल्मिक कराडचा मुलगा सुशील कराडच्या या पोस्टमुळे गुढ वाढलं आहे, नेमकं तो काय बोलणार? काय सांगणार असा सवाल उपस्थित केला जात आहे.

दरम्यान या पोस्टची चर्चा सुरू असतानाच त्याने आता पुन्हा एकदा सोशल मीडियावर आणखी एक पोस्ट केली आहे. त्याची ही पोस्ट देखील जोरदार व्हायरल झाली आहे. ज्यामध्ये त्याने राजाश्रय कुणाला (आम्हा/तुम्हा) असं म्हटलं आहे. मात्र या पोस्टमधून त्याला नेमकं काय म्हणायचं आहे? हे मात्र कळू शकलेलं नाहीये. तरी देखील ही पोस्ट चांगलीच व्हायरल झाली आहे.

दरम्यान परळी येथील व्यापारी महादेव मुंडे यांची हत्या झाली, या प्रकरणात देखील वाल्मिक कराड याच्यावरच आरोप करण्यात येत आहेत. महादेव मुंडे यांच्या मुलाला काही दिवसांपूर्वी मारहाण करण्यात आली होती, या प्रकरणात महादेव मुंडे यांच्या पत्नीने सुशील कराडवर आरोप केला आहे. सुशील कराडपासून धोका असून, आम्हाला संरक्षण मिळावं अशी मागणी त्यांनी केली होती.

वाल्मिक कराडचा जामीन फेटाळला

दरम्यान हाय कोर्टानं जामीन फेटाळल्यानंतर वाल्मिक कराडने जामिनासाठी सुप्रीम कोर्टात अर्ज केला होता, मात्र सुप्रीम कोर्टाने देखील त्याचा जामीन अर्ज फेटाळला आहे. आता त्याला पुढील वर्षभर जामिनासाठी कोणत्याही न्यायालयात अर्ज करता येणार नाही, कराडला आता वर्षभरानंतर जामीन अर्ज करण्याची मुभा न्यायालयानं दिली आहे. त्यामुळे आता पुढील वर्षभर तरी त्याचा मुक्काम हा जेलमध्येच असणार आहे.