Sharad Pawar interview : महायुतीला लाडक्या बहीण योजनेचा फायदा होणार का? शरद पवारांनी स्पष्टच सांगितलं

विधानसभा निवडणुकीची रणधुमाळी सुरू असतानाच शरद पवार यांची मुलाखत टीव्ही ९ मराठीवर प्रसारीत झाली आहे.  ‘टीव्ही ९ मराठीचे’ मॅनेजिंग एडिटर उमेश कुमावत यांनी घेतलेल्या या मुलाखतीमध्ये शरद पवार यांनी अनेक खुलासे केले असून, विरोधकांवर जोरदार हल्लाबोल केला आहे. सध्या लाडकी बहीण योजना हा विधानसभा निवडणुकीच्या प्रचारातील एक प्रमुख मुद्दा ठरला आहे, यावरून विरोधक आणि सत्ताधाऱ्यांमध्ये आरोप-प्रत्यारोप सुरू आहेत. या योजनेवर आता शरद पवार यांनी आपली प्रतिक्रिया व्यक्त केली आहे.

नेमकं काय म्हणाले शरद पवार? 

लाडकी बहीण म्हणजे सरकारी तिजोरीतून पैसे देणे. काही राज्यात पैसे मतांसाठी वाटतात. इथे दुसरं काय केलं. नाव गोंडस दिलं. पैसे सरकारी तिजोरीतून काढले आणि वाटप केले. लोक शहाणे आहेत. पैसे घेतात आणि दुसऱ्यांना मतदान करतात. मागच्या निवडणुकीत पाहिलं. पैसे वाटप झाले. लोकांनी पैसे घेतले पण मतदान करताना विरोधकांना दिलं. पैसे वाटण्याचा काही परिणाम झाला नाही. ज्यांनी पैसे वाटले ते पराभूत झाले. संसदीय लोकशाहीत लोक सजगपणे निर्णय घेतील. पैशाने प्रयत्न होईल, थोडाबहुत फरक पडेल,  पण निवडणुकीच्या निकालावर परिणाम होईल असं वाटत नाही, असं शरद पवार यांनी म्हटलं आहे.

दरम्यान या इलेक्शनची कँपेन म्हणजे लोकांचा पूर येतो. ज्यावेळी मतदान होईल तेव्हा आज जे सत्ताधारी आहेत त्यांच्या विरोधात असेल. लोकांच्या मनात परिवर्तन आहे. फक्त दडपशाही, दबाव, दहशत या सर्व गोष्टी निवडणुकीत दिसत आहेत. पण शांतपणे सर्व होईल. लोकसभेतही असंच चित्र होते. विरोधकांची कँपेन शांतपणे सुरू होती. पाच वर्षापूर्वी काँग्रेसला एक जागा आणि आम्हाला चार जागा मिळाल्या होत्या, मात्र  आता आम्हाला ३० जागा मिळाल्या. लोक शांतपणे निर्णय घेतात. रिअॅक्ट करत नाहीत. परिवर्तन करतात. या निवडणुकीत तेच होईल, असं शरद पवार यांनी म्हटलं आहे.