विमानतळावर महिला प्रवाशावर कुत्र्याचा हल्ला, उडाला गोंधळ, जखमी अवस्थेत…

विमान प्रवासाबद्दल अनेकदा अशा घटना घडत असतात की त्यांना ऐकून विमानाने प्रवास करणारे आणि न करणारे देखील चक्रावून जातात. अशीच विचित्र घटना जयपूर विमानतळावर रविवारी दुपारी घडली आहे. दिल्लीवरुन जयपूरला विमानाने उतरलेल्या एका महिला प्रवाशावर अचानक एका कुत्र्याने हल्लाबोल केला.या हल्ल्यात महिला प्रवासी गंभीर जखमी झाली. त्यामुळे विमानतळावर आणीबाणीची स्थिती जाहीर झाली.

ही घटना रविवारी दुपारी २.२० वाजता घडल्याचे म्हटले जात आहे. ही महिला प्रवासी विमानातून उतरुन टर्मिनल – २ च्या अरायव्हल एरियातून बाहेर पडत होती. त्याच वेळी गेटच्या बाहेर असलेल्या एका कुत्र्याने तिच्यावर हल्ला केला. या कुत्र्याने महिलेच्या पायाचा चावा घेतल्याने ती गंभीर जखमी झाली. ही महिला प्रवासी वेदनेने ओरडू लागली तसे सुरक्षारक्षकांनी धावाधाव केली.

 अफरातफरी माजली

जयपूर आंतरराष्ट्रीय विमानतळावर दिल्लीवरुन आलेली ही महिला प्रवासी उतरली,त्यानंतर ही महिला एराव्हल एरियातून बाहेर पडत असताना अचानक गेट जवळ उभ्या असलेल्या कुत्र्याने तिच्यावर भूंकत तिच्या पोटऱ्यांचा चावा घेतला,त्यामुळे विमानतळावर एकच अफरातफरी माजली. सुरक्षा रक्षकांनी धाव घेत त्या कुत्र्याला हाकलले आणि या महिलेला वैद्यकीय मदतीसाठी एम्ब्युलन्सला पाचारण केले. या घटनेत सुदैवाने या महिलेला वेळीच वैद्यकीय मदत मिळाली आणि तिला उपचारासाठी दवाखान्यात दाखल करण्यात आले आहे. डॉक्टरांनी महिलेवर प्राथमिक उपचार केल्यानंतर तिला रुग्णालयातून डिस्चार्ज दिला.

कुत्र्याचे झाले होते व्हॅक्सीनेशन

घटनेनंतर कळले की या कुत्र्याचे लसीकरण झाले होते. व्हॅक्सीनेशन झाले असल्याने या महिलेला जादा धोका नसल्याचे सांगण्यात येत आहे. परंतू या घटनेनंतर प्रवाशांच्या सुरक्षे संदर्भात प्रश्नचिन्ह निर्माण झाले आहे. या महिलेची प्रकृती आता धोक्यात नसल्याचे उघडकीस आले आहे.