त्रिशा कृष्णन टीव्हीकेमध्ये प्रवेश करणार; थलपती विजय यांच्यासाठी पोटनिवडणूक लढवणार?

तमिळ चित्रपटसृष्टीतील लोकप्रिय अभिनेता थलपती विजय यांनी राजकारणात धमाकेदार पदार्पण केलं आहे. त्यांचा ‘तमिळगा वेत्री कळघम’ (टीव्हीके) हा 2026 च्या तमिळनाडू विधानसभा निवडणुकीत सर्वांत मोठा पक्ष म्हणून उदयास आला आहे. या निवडणुकीत टीव्हीकेचा 234 पैकी 108 जागांवर विजय झाला असून बहुमताच्या आकड्यापासून केवळ 10 जागा दूर आहे. विजय यांनी स्वत: तिरुचिरापल्ली पूर्व आणि पेरांबूर या दोन मतदारसंघांमधून निवडणूक लढवली होती आणि या दोन्ही ठिकाणी त्यांचा विजय झाला आहे. बुधवारी त्यांनी सरकार स्थापन करण्याचा दावा करण्यासाठी चेन्नईतल्या लोकभवन इथं राज्यपाल राजेंद्र अर्लेकर यांची भेट घेतली. तर दुसरीकडे विजय यांचं वैयक्तिक आयुष्यसुद्धा प्रकाशझोतात आलं आहे. आता त्यांची कथित प्रेयसी त्रिशा कृष्णनसुद्धा लवकरच राजकारणात प्रवेश करणार असल्याची जोरदार चर्चा आहे.

तिरुचिरापल्ली पूर्वची जागा त्रिशा लढवणार?

थलपती विजय यांना नियमांनुसार निवडणुकीत जिंकलेल्या दोन्ही जागा राखता येणार नाहीत. त्यामुळे 14 दिवसांच्या आत एक जागा रिक्त करावी लागणार आहे. त्यामुळे जी जागा विजय सोडतील, त्या मतदारसंघात पोटनिवडणूक होईल. सूत्रांनी दिलेल्या माहितीनुसार, विजय पेरांबूर मतदारसंघ राखू शकतात आणि तिरुचिरापल्ली पूर्वची जागा ते सोडू शकतात. आता टीव्हीकेच्या या रिक्त जागेसाठी थलपती विजय हे गर्लफ्रेंड त्रिशा कृष्णनलाच उमेदवारी देण्याची चर्चा आहे. परंतु कोणताही राजकीय अनुभव नसल्यामुळे ती राजकारणात येण्यास संकोच करत असल्याचं वृत्त आहे.

विजय आणि त्रिशा यांच्या अफेअरच्या चर्चा

विजय आणि त्रिशा यांच्या नात्याबद्दलच्या अफवा गेल्या अनेक वर्षांपासून आहेत. ‘घिली’, ‘तिरुपाची’, ‘कुरवी’, ‘लिओ’ यांसारख्या चित्रपटांमधून ही जोडी प्रेक्षकांमध्ये तुफान हिट झाली. ऑनस्क्रीन केमिस्ट्री आणि ऑफस्क्रीन मैत्री.. या दोन्ही कारणांमुळे प्रेक्षकांमध्ये विजय आणि त्रिशा लोकप्रिय आहेत. त्यातच फेब्रुवारीमध्ये विजय यांची पत्नी संगीताने घटस्फोटासाठी अर्ज दाखल केला. त्यात त्यांनी विजय यांच्यावर एका अभिनेत्रीसोबत एक्स्ट्रा मॅरिटल अफेअर असल्याचा आरोप केला होता. या आरोपांनंतर विजय आणि त्रिशा एका विवाहसोहळ्याला एकत्र उपस्थित राहिले होते. विजय आणि संगीता यांनी 1999 मध्ये लग्न केलं असून या दोघांना दोन मुलं आहेत.

विजय किंवा त्रिशा यांनी अद्याप त्यांच्या नात्यावर कोणतीही प्रतिक्रिया दिली नाही. परंतु टीव्हीकेच्या विजयानंतर त्रिशा विजय यांच्या घरी त्यांना शुभेच्छा देण्यासाठी पोहोचली होती. त्यातही निकालाच्या दिवशी त्रिशाचा वाढदिवस असल्याने सोशल मीडियावर मीम्स महापूर आला होता. आता त्रिशासुद्धा राजकारणात पाऊल ठेवत टीव्हीकेकडून निवडणूक लढवणार का, हे पाहणं महत्त्वाचं ठरणार आहे.