Prateek Yadav Death : प्रतीक यादवच्या निधनावेळी पत्नी अपर्णा यादव कुठे होत्या, पोलिसांनी फोन घेतला ताब्यात

समाजवादी पार्टीचे संस्थापक मुलायम सिंह यादव यांचा छोटा मुलगा प्रतीक यादवचं आज बुधवारी आकस्मिक निधन झालं. तो अवघ्या 38 वर्षांचा होता. सूत्रांनी दिलेल्या माहितीनुसार प्रतीक घराच्या किचनमध्ये बेशुद्ध अवस्थेत सापडला. त्यानंतर त्याला लगेच लखनऊच्या सिविल हॉस्पिटलमध्ये नेण्यात आलं. पण रुग्णालयात पोहोचण्यापूर्वीच रस्त्यातच त्याने प्राण सोडले. मुलायम सिंह यादव कुटुंबाचा उत्तर प्रदेशच्या राजकारणात दबदबा आहे. आता मुलायम सिंह यांचे मोठे सुपूत्र अखिलेश यादव या पक्षाचे सर्वेसर्वा आहेत. प्रतीक यादव यांची पत्नी अपर्णा यादव भाजपमध्ये आहे. लखनऊ पोलीस प्रतीकची पत्नी अपर्णा यादव यांच्या घरी जाणार आहेत. पोलिसांनी प्रतीकचा फोन ताब्यात घेतला आहे. घरात किचनमध्ये प्रतीक बेशुद्ध अवस्थेत आढळला होता.

घरातील लोकांनी 4 वाजून 55 मिनिटांनी रुग्णालयाला याची माहिती दिली. जवळपास 6 वाजण्याच्या सुमारास प्रतीकला लखनऊच्या सिविल हॉस्पिटलमध्ये आणण्यात आलं. तिथे तपासणीनंतर डॉक्टरांनी प्रतीकला मृत घोषित केलं. सध्या त्याच्या मृत्यूचं कारण समजू शकलेलं नाही. मृतदेह पोस्टमॉर्टमसाठी KGMU येथे पाठवला आहे.

डॉक्टरांचं ऐकलं नाही

30 एप्रिल रोजी प्रतीकला मेदांता रुग्णालयात दाखल केलं होतं, असं कुटुंबातील सूत्रांनी सांगितलं. तिथे प्रतीकच्या प्रकृतीत सुधारणा होत होती, मात्र तरीही डॉक्टर त्याला डिस्चार्ज देत नव्हते. प्रतीक घरी येण्यासाठी हट्ट करत होता. अखेर त्याने डॉक्टरांचं ऐकलं नाही. जबरदस्तीने रुग्णालयातून डिस्चार्ज घेऊन घरी आलेला. घरी आल्यावर त्याच्यावर उपचार सुरु होते असं सूत्रांनी सांगितलं.

पतीच्या निधनावेळी अपर्णा यादव कुठे होत्या?

प्रतीकचा मृतदेह पोस्टमॉर्टमसाठी KGMU मध्ये पाठवला आहे. संपूर्ण पोस्टमॉर्टमची व्हिडिओ रेकॉर्डिंग करण्यात येईल. चार डॉक्टरांची टीम पोस्टमॉर्टम करेल. पोस्टमॉर्टम हाऊस बाहेर अपर्णा यादवचा भाऊ हजर आहे. अपर्णा यादव काल रात्री दिल्लीत होत्या. पतीच्या निधनाची माहिती मिळाल्यानंतर अपर्णा लखनऊसाठी रवाना झाल्या आहेत. प्रतीक यादव डिप्रेशनच्या आजाराचा सामना करत होता अशी माहिती आहे. त्याशिवाय नसांशी संबंधितही त्याला आजार होता. अखिलेश यादव KGMU रुग्णालयात पोहोचले आहेत.