नागपंचमीला गालबोट, उज्जैनच्या नागचंद्रेश्वर मंदिरात चेंगराचेंगरी; अनेक भक्त गंभीर जखमी
उज्जैनमध्ये नागपंचमीला गालबोट लागल्याची घटना घडली. यात उज्जैनच्या नागचंद्रेश्वर मंदिरात भक्तांची गर्दी नियंत्रणाबाहेर गेल्याने चेंगराचेंगरी झाल्याचे समोर आलं आहे.
श्रावण महिन्याच्या तिसऱ्या सोमवारी उज्जैनच्या महाकालेश्वर मंदिरात मोठ्या संख्येने भाविकांची गर्दी झाली आहे. त्याचबरोबर वर्षांतून एकदाच उघडण्यात येणाऱ्या नागचंद्रेश्वर मंदिरातही दर्शनासाठी भक्तांची गर्दी झाली. दर्शनाला सुरुवात झाल्यानंतर थोड्याच वेळात बॅरिकेट्सजवळ गर्दी नियंत्रणाच्या बाहेर गेली. त्यामुळे मंदिर परिसरात चेंगराचेंगरी परिस्थिती झाली. या घटनेने नागपंचमी सणाला गालबोट लागल्याचे बोललं जात आहे. मंदिरातील चेंगराचेंगरीच्या घटनेवरून सोशल मीडियावरील अफवांवर विश्वास ठेवू नये, असं आवाहन मंदिर समितीने केली आहे.
चेंगराचेंगरीच्या घटनेने अनेक भाविकांची तब्येत बिघडली. अनेक भक्त बेशुद्ध झाल्याचेही समोर आलं. मंदिरात असलेल्या सुरक्षा कर्मचाऱ्यांनी भाविकांना सुरक्षितपणे बाहेर काढले. त्यांनी जखमींना जवळच्या रुग्णालयातही दाखल केलं आहे. आतापर्यंत या घटनेत 13 भाविक जखमी झाल्याची माहिती हाती आली आहे. श्रावणा महिन्याच्या तिसऱ्या सोमवारी भगवान महाकाल यांच्यासोबत नागचंद्रेश्वर मंदिरात दर्शनासाठी सकाळपासून गर्दी झाली होती. मिळालेल्या माहितीनुसार, या मंदिरात सकाळपासून 5.50 लाख भाविकांनी दर्शन घेतलं आहे. त्यात नागचंद्रेश्वर मंदिर हे वर्षातून एकदाच उघडले जाते. त्यामुळे दरवर्षी दर्शनासाठी मोठ्या संख्येने भाविक उज्जैनला येतात.
मंदिर समितीने चेंगराचेंगरीचं वृत्त फेटाळलं
मंदिर समितीने चेंगराचेंगरीचं वृत्त फेटाळलं. भाविकांनी अफवांवर विश्वास ठेवू नये, असं आवाहन मंदिर समितीने केलं आहे. नागपंचमी, श्रावण सोमवार आणि भगवान श्री महाकालेश्वर मंदिरात भक्तांची मोठी संख्या वाढली. आतापर्यंत 6.19 लाख भाविकांनी दर्शन घेतलं. या मंदिरात भाविकांनी अनेक रांगा लावल्या आहेत. भाविकांनी केवळ अधिकृत सूचनेवर विश्वास ठेवावा, अशी माहिती मंदिर समितीने दिली आहे.
नेमकं काय घडलं?
महाकाल मंदिरातील नागचंद्रेश्वर मंदिराच्या दर्शनाच्या रांगेत शॉक लागत असल्याची अफवा भक्तांमध्ये पसरली. त्यामुळे भक्त भयभीत झाले. तसेच हरिसिद्धी मंदिराच्या बॅरिकेट्सच्या जवळील डीपीजवळ देखील शॉक लागत असल्याची अफवा भक्तांमध्ये पसरली. त्यामुळे दोन्ही ठिकाणी चेंगराचेंगरी सारखी निर्माण झाली. यावेळी भक्त एकमेकांच्या अंगावर पडले. या घटनेत अनेक भक्त जखमी झाले. त्यांना सुरक्षा कर्मचाऱ्यांनी तातडीने रुग्णालयात दाखल केले.
