Rahul Gandhi : न्यायाच्या दिशेने हे पहिलं पाऊल .. पॅलेट गन प्रकरणी गुन्हा दाखल झाल्यावर राहुल गांधींची पहिली प्रतिक्रिया

राजधानी दिल्लीतील जंतरमंतर येथील कॉकरोच जनता पार्टीच्या आंदोलनादरम्यान पॅलेट गनचा वापर करण्यात आला होता. त्याची चौकशी सुरू आहे. याच पॅलेट गन पीडित तरुणाला घेऊन काँग्रेस नेते राहुल गांधी आज सकाळी संसद मार्ग पोलीस ठाण्यात पोहोचले. गुन्हा दाखल करण्याची मागणी करत त्यांनी तिथे अनेक तास ठिय्याही दिला.  अखेर अनेक तासांनी पोलीस झुकले आणि तब्बल महिन्याभरानंतर याप्रकरणी एफआयआर नोंदवण्यात आली केली.  यानंतर आता राहुल गांधींची पहिली प्रतिक्रिया समोर आली आहे. ‘ही तर फक्त सुरुवात आहे,  न्यायाच्या दिशेने हे पहिलं पाऊल आहे’, असं ते म्हणाले. तक्रार दाखल करायला 7 ते 8 तास लागले, पोलिसांना तक्रार दाखल करायची होती, पण वरून थांबवण्यात आलं असा आरोपही त्यांनी केला.

पॅलेट गन प्रकरणात एफआयआर दाखल झाल्यानंतर राहुल गांधी म्हणाले की, ‘ एका तरुणावर अन्याय झाला आहे. तो साडेअकरा वाजता आला होता आणि आता पावणेसात वाजले आहेत; आता कुठे एफआयआर दाखल झाली आहे. आम्हाला 8 तास लागले. जेव्हा दिल्लीत न्याय मिळत नाही, तेव्हा एखाद्या गावात किंवा छोट्या शहरातील पोलीस ठाण्यात काय परिस्थिती असेल, याचा विचार करा. आम्ही कोणतंही चुकीचं काम केलेलं नाही’, असं त्यांनी नमूद केलं.

न्यायासाठी 8 तास लागले

‘ आम्ही फक्त देशातील एका नागरिकासाठी आणि त्याच्या आई-वडिलांसाठी न्याय मागितला आणि त्यासाठी 8 तास लागले. अंतिम मंजुरी होम सेक्रेटरी आणि स्वतः अमित शाह यांच्याकडून घ्यावी लागली. त्यानंतरच एफआयआर दाखल होऊ शकली. यावरून समजू शकतं की एफआयआर कोण रोखत होतं. पोलीस अधिकारी एफआयआर नोंदवू इच्छित होते, पण त्यांना वरून रोखलं जात होतं’ असा आरोप त्यांनी केला.

काय आहे प्रकरण ?

साहिल लोहबच 20 जुलै रोजी आंदोलनादरम्यान कनॉट पॅलेसजवळ उपस्थित होता. मात्र या आंदोलनादरम्यान पॅलेट गनचा वापर करण्यात आला, असा आरोप साहिलने केला. त्याच्या शरीरात काही छर्रेही घुसले, एका गोळीचा छर्रा त्याच्या हृदयाजवळही लागला. याच पार्श्वभूमीवर राहुल गांधी हे आज दुपारपासूनच राहुल गांधी संसद मार्ग पोलीस ठाण्याच्या बाहेर ठाण मांडून बसले होते. त्यांच्यासोबतच पॅलेट गन पीडित साहिल, तसेच त्याच्या आई-वडिलांनीही पोलीस ठाण्याबाहेर ठिय्या दिला होता. या आंदोलनात काँग्रेस नेत्या प्रियंका गांधीही सामील झाल्या. या प्रकरणी एफआयआर दाखल करण्यात यावी अशी राहुल गांधी यांची मागणी होती,पण पोलिसांनी त्यास नकार दिला. मात्र राहुल गांधी हे त्यांच्या मागणीवर ठाम होते. अखेर अनेक तासांचं त्यांचं ठिय्या आंदोलन यशस्वी ठरलं आणि पोलिस झुकले, त्यांनी अज्ञातांविरोधात गुन्हा दाखल केला.