श्रीराम मंदिर, योगी आदित्यनाथ यांना बॉम्बने उडवण्याची धमकी, ईमेलमध्ये म्हटले…

मुंबई, दि. 1 जानेवारी 2024 | अयोध्येत श्रीराम मंदिर सोहळ्याचा प्राण प्रतिष्ठा सोहळा २२ जानेवारी रोजी होणार आहे. या सोहळ्याची जोरदार तयारी अयोध्येत सुरु आहे. पंतप्रधान नरेंद्र मोदी यांनी अयोध्या रेल्वे स्टेशन आणि विमानतळाचे दोन दिवसांपूर्वी लोकार्पण केले. पंतप्रधान नरेंद्र मोदी यांच्या दौऱ्या संपल्यानंतर अयोध्येतील श्रीराम मंदिर बॉम्बने उडवण्याची धमकी मिळाली आहे. या धमकीमुळे खळबळ उडाली आहे. उत्तर प्रदेशचे मुख्यमंत्री योगी आदित्यनाथ, उत्तर प्रदेश एटीएस प्रमुख अमिताभ यश यांनाही ठार मारण्यात येणार असल्याचे धमकीचा ईमेलमध्ये म्हटले आहे. धमकी देणारा स्वत:ला आयएसआयशी संबंधित असल्याचा दावा करत आहे. भारतीय किसान मंचचे राष्ट्रीय अध्यक्ष देवेंद्र तिवारी यांना हा मेल पाठवण्यात आला आहे. पोलिसांनी या प्रकरणी गुन्हा दाखल केला असून तपास सुरु करण्यात आला आहे.

कोणी पाठवला ईमेल

भारतीय किसान मंच आणि राष्ट्रीय गौ परिषदेचे कार्यकर्ते असलेल्या देवेंद्र तिवारी यांना हा मेल आहे. या मेलमध्ये आक्षेपार्ह शब्दाचा वापर करण्यात आला आहे. ईमेल पाठवणारा व्यक्तीने स्वत:चे नाव जुबेर हुसैन खान असल्याचे म्हटले आहे. आपण आयएसआयशी संबंधित असल्याचा दावा त्याने केला आहे. यासंदर्भात देवेंद्र तिवारी यांनी आपल्या एक्स (ट्विटर) अकाउंटवर माहिती दिली आहे. त्यात म्हटले आहे की, श्रीराम मंदिर, उत्तर प्रदेशचे मुख्यमंत्री योगी आदित्यनाथ, एसटीएफचे प्रमुख अमिताभ यश आणि मला जुबेर खान नावाच्या व्यक्तीने ठार मारण्याची धमकी दिली आहे.

काय म्हणतात देवेंद्र तिवारी

देवेंद्र तिवारी यांनी म्हटले आहे की, आपण पोलीस ठाण्यात तक्रार दिली आहे. त्यानंतर आपल्या सुरक्षेबाबत काहीच उपाययोजना करण्यात आली नाही. यामुळे गौसेवेच्या नावावर आपण शहीद होऊ शकतो. दरम्यान या प्रकरणाचा तपास लखनऊ एटीएसकडून सुरु करण्यात आला आहे. २२ जानेवारी रोजी राम मंदिराच्या प्राणप्रतिष्ठा सोहळा होणार असताना हा धमकीचा मेल आला आहे. यामुळे उत्तर प्रदेश पोलिसांसमोर आव्हान उभे राहिले आहे.