जगातलं सर्वात उंच मंदिर, डोळ्याचं पारणं फेडणारा गाभारा, गर्दी होईल, रांगा नाहीत!! 2 मिनिटांत थेट गाभाऱ्यापर्यंत प्रवेश, कुठे उभारलं जातंय?

भारतात  (India)उभं राहतंय जगातलं (World) सर्वात उंच मंदिर (Tallest temple). 1500 कोटी कोटी रुपये खर्च करून हे 504 फूच उंच मंदिर बांधलं जातंय. मंदिराची लांबी ४०० फूट असेल. मंदिरात 51 फूट उंचीची देवीची मूर्ती असेल. गुजरात राज्यातील अहमदाबाद येथे वैष्णोदेवी सर्कलजवळ जासपूर इथे हा प्रकल्प उभा राहतोय. जगत जननी मां उमिया देवीचं हे मंदिर असेल. मंदिराच्या गर्भगृहाचा पाया तयार झालाय. 2026 मध्ये भव्य मूर्तीची प्राणप्रतिष्ठा केली जाईल. त्यानंतर सामान्य भाविकांसाठी ते खुले होईल. मंदिराची अनेक वैशिष्ट्य आहे. त्यापैकी एक म्हणजे इथे दर्शनाला असंख्य ठिकाणाहून भाविक येतील. पण गर्दी जाणवणार नाही. रांगेत ताटकळत उभं रहावं लागणार नाही. तर 2 मिनिटात थेट देवीच्या गाभाऱ्यापर्यंत नेऊन सोडलं जाईल.

जर्मन आणि भारतीय स्थापत्यशास्त्र

या मंदिराची अनेक वैशिष्ट्ये आहेत. जर्मन आणि भारतीय स्थापत्यकलेचा हा उत्तम संगम असेल. उमियाधाम संस्थानाच्या मते, मंदिरात 1440 खांब असतील. हा एक विक्रम ठरेल. यापू्र्वी सरदार पटेल यांच्या जगातील सर्वात उंच पुतळ्याला 800 खांब वापरण्यात आले होते. मंदिर बांधकामासाठी एक मोहीम राबवली जात आहे. हुं पण पायानो पिल्लर… असं त्याचं नाव आहे. याअंतर्गत कुणीही व्यक्ती 11 लाख रुपये देऊन हा खांब आपल्या नावाने बांधू शकतो. आतापर्यंत ४०० जणांनी खांब बांधण्यासाठी दान दिलंय. यात पाटीदार आणि इतर समाजबांधव तसेच एनआरआयचाही समावेश आहे.

300 फूट उंचावरून दिसेल शहराचा नजारा

या मंदिरात 300 फूट उंचावर एक व्ह्युइंग गॅलरी असेल. इथून अहमदाबाद शहराचं संपूर्ण दृश्य डोळ्यात साठवता येईल. संस्थानच्या मते, मंदिर पूर्ण झाल्यानंतर जर्मनीची टीम येईल आणि ते किती मजबूत झालंय, याची तपासणी करेल. तपासण्या होतील. ही प्रक्रिया 6 महिने चालेल. त्यानंतर मंदिरात मूर्तीची प्रतिष्ठापना होईल.

न रांग, ना चेंगरा-चेंगरी

मंदिराचं वैशिष्ट्य म्हणजे इथं दर्शनासाठी रांग लावाली लागणार नाही. त्यामुळे धक्काबुक्की नाही आणि चेंगरा-चेंगरीची तर सूतराम शक्यता नाही. भाविकांसाठी व्हीआयपी पासही नसतील. त्याऐवजी एस्केलेटर्स लावण्यात आले आहे. या एस्केलेटर्सची स्पीडही निश्चित ठरलेली असेल. भाविक दोन मिनिटात देवीच्या गाभाऱ्यापर्यंत पोहोचतील. हे भव्य मंदिर पाहण्यासाठी गर्दी उसळण्याची शक्यता आहे. त्यामुळे ही खास व्यवस्था करण्यात आली आहे. तसेच दोन मजले पार्किंगसाठी ठेवण्यात आले आहेत.