“संजय राऊत, एक तर तुम्ही या नाही तर आम्ही येतो”; कन्नडिगांनी राऊतांना डिवचलं

बेळगावः महाराष्ट्र-कर्नाटक वादावर लवकर तोडगा निघाला नाही तर, माझ्यासह आमच्या नेत्यांना बेळगावला जावं लागेल असा इशारा राष्ट्रवादीचे अध्यक्ष शरद पवार यांनी दिला होता. त्यानंतर 48 तासानंतरही हा वाद विकोपाला जात असून आता कर्नाटकातील कन्नड रक्षण वेदिकेच्या कार्यकर्त्यांनी महाराष्ट्रासह ठाकरे गटाचे खासदार संजय राऊत यांनाच थेट इशारा दिला आहे.

महाराष्ट्रातून कर्नाटकात आलेल्या वाहनांची कन्नड रक्षण वेदिकेच्या कार्यकर्त्यांनी तोडफोड केली होती. त्यानंतर त्याचे जशास तसे पडसाद महाराष्ट्रात उमटले.

त्यानंतर आता कन्नड रक्षण वेदिकेच्या कार्यकर्त्यांनी खासदार संजय राऊत यांना हिम्मत असेल तर बेळगावामध्ये या. नाही तर आम्ही तर तिकडे येतो असा थेट इशाराच राऊतांना देण्यात आला आहे. त्यामुळे हे प्रकरण आता आणखी चिघळणार असल्याचे दिसत आहे.

महाराष्ट्रात विविध संघटनांनी जशास तसे उत्तर दिल्यानंतर कर्नाटकातील वेगवेगळ्या संघटनांनीही आता महाराष्ट्राला इशारा देत बसला काळे काय फासता, हिम्मत असेल तर बेळगावमध्ये या अशा चिथावणीखोर वक्तव्य केली आहेत.

महाराष्ट्रात गेलेल्या कर्नाटक परिवहन महामंडळाच्या बसला काळे फासून त्यावर महाराष्ट्राचे स्टिकर लावल्या प्रकरणी कन्नड रक्षण वेदिकेच्या कार्यर्त्यांनी हा चिथावणीखोर इशारा दिला आहे.

कन्नड रक्षण वेदिकेच्या कार्यकर्त्यांमुळे सीमाभागातील गावामध्ये ताणतणाव पसरत आहे. त्यामुळे या परिसरात महाराष्ट्र आणि कर्नाटकची असणारी बससेवा ठप्प झाली आहे.

महाराष्ट्र-कर्नाटक सीमावादावर दोन्ही राज्यातील सरकार काय भूमिका घेणार याकडे साऱ्यांचे लक्ष लागून राहिले आहे. तर दुसरीकडे सांगली आणि सोलापूर जिल्ह्यातील गावांनी कर्नाटकात जाण्याचा निर्णय घेतला असल्याने हा वाद आणखी चिघळणार आहे.