गोवा काँग्रेसमध्ये उभी फूट, 15 पैकी 10 आमदार भाजपच्या वाटेवर

पणजी : आधी तेलंगणा, नंतर कर्नाटक आणि गोव्यातही काँग्रेसमध्ये उभी फूट पडली आहे. कर्नाटकातील बंड थंड होत नाही तोपर्यंतच गोव्यातील काँग्रेसच्या 15 पैकी 10 आमदारांनी राजीनामा दिलाय आणि भाजपात जाण्याचे संकेत दिले आहेत. गोवा विधानसभा निवडणुकीत काँग्रेस सर्वात मोठा पक्ष ठरला होता. पण भाजपने स्थानिक पक्ष आणि अपक्षांच्या मदतीने सत्ता स्थापन करत काँग्रेसला सत्तेपासून दूर ठेवलं होतं.

राजीनामा दिलेल्या आमदारांमध्ये बाबू कवलेकर, बाबुश मोनसर्राट्टे आणि त्यांची पत्नी जेनीफर मोनसर्राट्टे, टोनी फर्नांडिस, फ्रान्सिस सेल्विरा, फिलिप नेरी रॉड्रिग्स, विलफ्रेड डे सा, निलकांत हळकणकर आणि इसिदोर फर्नांडिस यांचा समावेश आहे. या आमदारांच्या राजीनाम्यामुळे सध्या सत्तेत असलेल्या भाजपची ताकत आणखी वाढणार आहे. शिवाय भाजपसोबत सत्तेत असलेल्या गोवा फॉरवर्ड पक्षाचे आमदार आणि उपमुख्यमंत्री विजय सरदेसाई यांचं पद काढून घेतलं जाण्याची शक्यता आहे.

दरम्यान, गोव्याचे भाजप प्रदेशाध्यक्ष विनय तेंडुलकर यांनी नुकताच दावा केला होता, की काँग्रेसचे 10 आमदार भाजपात येण्यासाठी इच्छुक आहेत, पण त्यांना होल्डवर ठेवलं आहे. अखेर विनय तेंडुलकर यांचा दावा खरा ठरलाय. काँग्रेसमध्ये सध्या कर्नाटकातील संकाटमुळे अस्थितरतेचं वातावरण आहे. काही दिवसांपूर्वीच तेलंगणामध्ये काँग्रेसच्या 13 आमदारांनी तेलंगणा राष्ट्र समितीमध्ये प्रवेश केला होता.

कर्नाटकात सत्ता जाण्याचं संकट

कर्नाटकाच्या राजकारणात सध्या नाट्यमय घडामोडी सुरु आहेत. सत्ताधारी काँग्रेस-जेडीएसच्या 15 ते 16 आमदारांनी राजीनामा दिलाय आणि मुंबईत मुक्काम ठोकलाय. काँग्रेसकडून या आमदारांची मनधरणी करण्याचा प्रयत्न केला जातोय. कर्नाटकचे मंत्री डी शिवकुमार या आमदारांना भेटण्यासाठी मुंबईत आले होते. पण त्यांना पोलिसांनी जमावबंदीचं उल्लंघन केल्याप्रकरणी ताब्यात घेतलं आणि जबरदस्तीने विमानतळावर नेलं. काँग्रेस-जेडीएस सरकार सध्या बहुमत गमावण्याच्या परिस्थितीमध्ये आहे, तर भाजपनेही कर्नाटकचे मुख्यमंत्री एचडी कुमारस्वामी यांच्या राजीनाम्यासाठी दबाव वाढवला आहे.