अजित पवार मुख्यमंत्री झाले तर तुम्हाला आवडेल का? अमृता फडणवीस यांनी दिलं अचूक उत्तर

मुंबई : राष्ट्रवादी काँग्रेसचे नेते आणि विधानसभेचे विरोधी पक्षनेते अजित पवार (Ajit Pawar) यांच्याबाबत सातत्याने उलटसुलट चर्चांना उधाण येताना दिसत आहेत. अजित पवार राष्ट्रवादीत नाराज आहेत, ते आमदारांचा एक गट घेऊन भाजपसोबत जाऊ शकतात. राज्याच्या सत्तासंघर्षाचा निकाल लागल्यानंतर अजित पवार मुख्यमंत्री होतील, अशा चर्चांना गेल्या काही दिवासांपासून उधाण आलं आहे. तर दुसरीकडे अजित पवार यांनी आपण आयुष्यभर राष्ट्रवादी काँग्रेस पक्षासोबत असणार असल्याचं म्हटलं आहे. पण अजित पवार यांनी नुकतंच एक मुलाखत दिली. त्यामुलाखतीत त्यांनी मुख्यमंत्री होण्याची इच्छा व्यक्त केली. या सगळ्या घडामोडींनंतर आता उपमुख्यमंत्री देवेंद्र फडणवीस यांच्या पत्नी अमृता फडणवीस यांना याबाबचत प्रश्न विचारण्यात आला असता त्यांनी आपली स्पष्ट भूमिका मांडली.

अजित पवार मुख्यमंत्री झाले तर आवडेल का?

अजित पवार मुख्यमंत्री झाले तर तुम्हाला आवडेल का? असा प्रश्न अमृता फडणवीस यांना विचारण्यात आला. त्यावर अमृता यांनी आपली भूमिका मांडली. “मला कोणीही मुख्यमंत्री झालं तर आवडेल. महाराष्ट्रासाठी 24 तास झोकून देऊन काम करणारा कोणताही माणूस मला मुख्यमंत्री झालेला आवडेल”, असं उत्तर अमृता फडणवीस यांनी दिलं.

अजित पवार भाजपमध्ये आले आणि मुख्यमंत्रीपदाची इच्छा व्यक्त केली तर?

अजित पवार जर भाजपमध्ये आले आणि त्यांनी भाजपमध्ये येऊन मुख्यमंत्री होण्याची इच्छा व्यक्त केली तर अमृता फडणवीस यांना यावर काय वाटतं? असा प्रश्न विचारण्यात आला तेव्हा, “मला वाटतं महाराष्ट्र आपला असा राज्य आहे जे खूप काही करू शकतं, खूप काही करत आहे. यासाठी जो माणूस आपल्याला जनतेला, जी पार्टी पुढे येते, त्या पार्टीला ठीक वाटला, जर न्याय देऊ शकेल असं वाटलं, तर ते चांगलं आहे. तो कोणीही असला तरी चालेल”, असं चोख उत्तर अमृता फडणवीस यांनी यावेळी दिलं.

‘देवेंद्र फडणवीस आणि अजित पवार यांची मैत्री, अनेकदा डोळा मारतात’

देवेंद्र फडणवीस आणि अजित पवार यांची मैत्री खूप जवळची आहे का? असा प्रश्न नंतर अमृता यांना विचारण्यात आला. त्यावर त्यांनी मिश्किल उत्तर दिलं. “ते त्या दोघांना जास्त माहिती आहे. राजकारणी लोक, त्यांची मैत्री असते, अनेकदा डोळे मारतात, खूप ठिकाणी डोळे मारतात”, असा मिश्किल टोला अमृता फडणवीस यांनी अजित पवार यांना लगावला.