दिशा सालियान मृत्यूप्रकरणावरून सभागृहात गोंधळ, अजित पवार म्हणाले “सत्ताधारी पक्षाने गोंधळ घालायचा नसतो, तुम्ही तर…”

नागपूर : सुशांतसिंह राजपूत आणि दिशा सालियान मृत्यू प्रकरणावरून (Sushant Singh Rajput Death Case) राज्यातील राजकारण तापलंय. सत्ताधाऱ्यांकडून या प्रकरणाच्या चौकशीची मागणी होत आहे. यावरून सभागृहात गोंधळ (Assembly Winter Session) पाहायला मिळाला. विधानसभेचे विरोधी पक्षनेते अजित पवार (Ajit Pawar) यांनी यावर प्रतिक्रिया दिली आहे.

“सत्ताधारी पक्षाने गोंधळ घालायचा नसतो. त्यांनी विरोधकांच्या, जनतेच्या प्रश्नांची उत्तर द्यायची असतात. इथं उलटं दिसत आहे. सत्ताधारीच विधिमंडळात गोंधळ घालत आहेत”, असं अजित पवार म्हणालेत.

दिशा सालियान मृत्यू प्रकरणात आदित्य ठाकरे यांची नार्को टेस्ट करा, अशी मागणी शिंदेगट आणि भाजपकडून करण्यात येत आहे. विशेषत: नितेश राणे यांनी ही मागणी लावून घरली आहे. याबाबत अजित पवार यांना प्रश्न विचारण्यात आला. तेव्हा हे कुणाचीही नार्को टेस्ट करायला सांगतील. ते उद्या तुमचीही नार्को टेस्ट करण्याची मागणी करतील. नार्को टेस्ट करण्याचं कारण काय? असं चालत नाही, असं अजित पवार म्हणालेत.

श्रद्धा वालकर हत्या प्रकरणात जसं आफताब पुनावालाची नार्को टेस्ट झाली आणि सत्य बाहेर आलं. तसंच आदित्य ठाकरे यांची नार्को टेस्ट करा. सुशांतसिंह केसमधील सत्य समोर येईल, अशी मागणी नितेश राणे यांनी केली. त्याला अजित पवार यांनी उत्तर दिलंय.

दिशा सालियान मृत्यू प्रकरणाचे पडसाद आज विधिमंडळ अधिवेशनात पाहायला मिळाले. भरत गोगावले आणि नितेश राणे यांनी विधानसभेत बोलताना हा मुद्दा उपस्थित केला. त्यानंतर विधिमंडळात गोंधळ पाहायला मिळाला. दिशा सालियान मृत्यू प्रकरणाची केस रिओपन करा. या प्रकरणाची पुन्हा एकदा कसून चौकशी झाली पाहिजे, अशी मागणी नितेश राणे यांनी सभागृहात केली. त्यानंतर गोंधळाचं वातावरण पाहायला मिळालं.