Eknath Shinde vs Thackeray : आनंद दिघेंचे शागिर्द एकनाथ शिंदे ‘खऱ्या शिवसेनेचा’ नवा पक्षप्रमुख? सत्तेसोबत पक्षही ठाकरेंच्या हातून जाणार?

मुंबई : आनंद दिघे (Anand Dighe) यांचे कट्टर समर्थक असलेल्या एकनाथ शिंदे (Eknath Shinde) यांच्या बंडानं खळबळ माजली आहे. उद्धव ठाकरे यांना एकनाथ शिंदे यांनी थेट आव्हान दिलंय. आमदार आसाममध्ये सध्या बंडखोर आमदारांना घेऊन एकनाथ शिंदे आहेत. आपल्यासोबत 46 आमदार असल्याचा दावा त्यांनी केला होता. माझ्यासोबत असलेले शिवसेना आमदार हीच खरी शिवसेना आहे, असा दावा देखील त्यांनी केलाय. त्यामुळे नेमकं राजकीय घाडमोडींवर आता महत्त्वपूर्ण मुद्दा उपस्थित केला जातोय. आनंद दिघे यांचा शागिर्द असलेल्या एकनाथ शिंदे हे खऱ्या शिवसेनेचे (Shivsena) नवे पक्षप्रमुख असणार की काय? अशी चर्चा आता रंगू लागलीय. अंतर्गत खदखद, हिंदुत्त्वाचा मुद्दा यासाठी शिंदेनी बंडखोरी केल्याची चर्चा रंगली आहे. त्यात जास्तीत जास्त काय होईल, सत्ता जाईल, असं संजय राऊतांनी म्हटलेलं होतं. त्यानंतर आता सत्ता गेली, तर सत्तेसोबतच पक्षही ठाकरेंच्या हातून निसटला जाण्याची शक्यता असल्याचं बोललं जातंय.

आदित्यसोबत भांडण?

आदित्य ठाकरे यांचा एकनाथ शिंदे यांच्या खात्यातील वाढता हस्तक्षेत एकनाथ शिंदे यांना खुपू लागला होता. 2019 पासूनच याची चाहूल एकनाथ शिंदे यांना लागलेली होती. नगरविकास खांत एकनाथ शिंदे यांच्याकडे होतं. वेगवेगळ्या मुद्द्यांवरुन आदित्य ठाकरे यांच्याशी शिंदे यांचे मतभेद झाले होते. एमएमआरडीसीतही आदित्य यांना प्रोजेक्ट केलं जात होतं. अशातच उद्धव ठाकरे यांनी वर्धापन दिनाच्या वेळी केलेल्या भाषणाने थेट एकनाथ शिंदे यांना संकेत दिलेले होते.

आता आपल्याकडे फार वेळ नाही राहिलेला याची जाणीव बहुधा एकनाथ शिंदे यांना झालेली असावी. त्यामुळे त्यांनी अखेर बंडखोरी करण्याचा निर्णय घेतला असावा, अशी शक्यता वर्तवली जातेय. राज्यसभा निवडणुकीत भाजपसोबत जाण्याचा प्रस्ताव एकनाथ शिंदे यांनी शिवसेनेच्या बैठकीत ठेवला होता. पण हा प्रस्ताव संजय राऊत यांनी अमान्य केला होता, असंही सांगितलं जातंय.

सत्ता तर जाणार आणि पक्षही जाणार?

दरम्यान, एकनाथ शिंदे यांनी आपल्याकडे 40 आमदार असल्याचं म्हटलं होतं. त्यानंतर आता एकूण 34 आमदारांच्या सह्या असलेलं पत्र विधानसभा उपाध्यक्षांना पाठवण्यात आलं आहे. तसंच भरत गोगावले हे मुख्य प्रतोद असल्याचंही एकनाथ खडसेंनी म्हटल्यामुळे एकच खळबळ उडाली आहे. त्याआधी काल सतरा आमदारांच्या स्वाक्षऱ्यांचं पत्र विधानसभा उपाध्यक्षांना देण्यात आलं होतं. या पत्राद्वारे शिवसेनेनं एकनाथ शिंदे यांची गटनेते पदावरुन हकालपट्टी करुन अजय चौधरी यांची नेमणूक केली होती.

यानंतर प्रचंड संतापलेल्या एकनाथ शिंदे यांनी अखेर आज 34 आमदारांच्या सहीचं पत्र दिल्याचंही आता समोर आलेलं होतं. एकनाथ शिंदे यांना पक्षांतर बंदी कायद्याला बायपास करायचं असेल, तर त्यांना 37 आमदारांची गरज आहेत. आपल्या 40हून अधिक आमदार असल्याचा शिंदे यांनी केल्यानं सेनेला हा मोठा धक्का मानला जातोय. एकनाथ शिंदे यांनी अख्खी शिवसेना फोडली की शिवसेनेलाच टेक ओव्हर केलं, असा मुद्दाही आता उपस्थित होतोय. एकीकडे संख्याबळाची जुळवाजुळव आणि दुसरीकडे खऱ्या शिवसेनेचं पक्ष प्रमुखपद, अशा दोन्ही गोष्टी एकनाथ शिंदेच्या वाट्याला येतात की काय, याकडे सगळ्यांचं लक्ष लागलंय.

सत्तेचं गणित कसं असेल?

बंडानंतर एकनाथ शिंदे गट मजबूत!

1. एकनाथ शिंदे – 47
2. भाजप – 106
3. अपक्ष – 13
4. एकूण – 166

बंडानंतरची महाविकास आघाडीची अवस्था

1. शिवसेना – 14
2. राष्ट्रवादी – 53
3. काँग्रेस – 44
4. अपक्ष – 10
5. एकूण – 121