चंद्रकांत पाटील यांच्या भीक मागणाच्या ‘त्या’ विधानाचे विधिमंडळात पडसाद, देवेंद्र फडणवीसांचं समर्थन? म्हणाले…

नागपूर : राज्याचे उपमुख्यमंत्री देवेंद्र फडणवीस (Devendra Fadnavis) यांनी विधिमंडळात बोलताना चंद्रकांत पाटील (Chandrakant Patil) यांच्या ‘त्या’ वादग्रस्त वक्तव्यावर भाष्य केलंय. यावेळी बोलताना त्यांनी प्रबोधनकार ठाकरेंच्या पुस्तकाचा संदर्भ दिलाय. चंद्रकांत पाटील यांच्या वक्तव्याचं मी समर्थन करत नाही, असं फडणवीस म्हणाले. शिवाय प्रबोधनकार ठाकरे (Prabodhankar Thackeray) यांच्या पुस्तकाचाही दाखला त्यांनी दिलाय.

विधिमंडळात देवेंद्र फडणवीस यांनी चंद्रकांत पाटील यांच्या विधानावर बोलताना प्रबोधनकार ठाकरे यांच्या माझी जीवनगाथा पुस्तकाचा संदर्भ दिला. त्यातील काही मजकूरही वाचून दाखवला. भीक मागणे याचा अर्थ काय? हे या पुस्तकाचा संदर्भ देत त्यांनी समजावून सांगितलं.

पुण्यातील एका कार्यक्रमात बोलताना चंद्रकांत पाटील यांनी सदर वादग्रस्त वक्तव्य केलं होतं. डॉ. बाबासाहेब आंबेडकर आणि महात्मा ज्योतिराव फुले यांनीही शाळा सुरु केल्या. मात्र शाळा सुरु करताना सरकारने त्यांना अनुदान दिलं नाही. तर त्यांनी लोकांकडे भीक मागितली, असं वक्तव्य चंद्रकांत पाटील यांनी केलं.

चंद्रकांत पाटील यांच्या या विधानानंतर विविध स्तरातून संतप्त प्रतिक्रिया उमटल्या. चंद्रकांत पाटील यांच्या माफीची मागणी झाली. विरोधकांनी चंद्रकांत पाटलांना घेरलं.

महापुरुषांनी भीक मागितल्याचं वक्तव्य करणं चुकीचं आहे, असं म्हणत चंद्रकांत पाटलांविरोधात तीव्र संताप व्यक्त करण्यात आला.

चंद्रकांत पाटील यांच्या या विधानाचा कडाडून विरोध झाला.पिंपरीत त्यांच्यावर शाईफेकही झाली.

“महापुरुषांच्या महान कार्याविषयी मला मनापासून आदर आहे. त्यांच्याविषयी बोलताना माझ्याकडून बोली भाषेतील शब्द अनवधानाने निघाले, यात मला कोणालाही दुखवायचा हेतू नव्हता”, असं म्हणत चंद्रकांत पाटील यांनी माफीही मागितली. या प्रकरणाचे आज विधिमंडळात पडसाद उमटले.