Dhananjay Munde : धनंजय मुंडे यांनी अपघातग्रस्त तरुणाचा वाचवला जीव, मुंडेंचा फोन अन अँब्युलन्स दोन मिनिटात हजर

परळी : बीड येथील शासकीय बैठका आटोपून परत परळीला येत असताना सामाजिक न्याय मंत्री धनंजय मुंडे (Dhanajay Munde) यांनी आज रस्त्यात अपघातग्रस्त झालेल्या एका तरुणाचे प्राण वाचवण्यास मदत केली आहे. बीडवरून परळीकडे (Parali) जात असताना सिरसाळा ते पांगरी दरम्यान एक तरुण दुचाकीस्वार अपघात (Accident) होऊन रस्त्यावर अक्षरश: रक्ताच्या थारोळ्यात पडलेला होता, हे दृश्य पाहताच धनंजय मुंडे यांनी आपला ताफा तात्काळ थांबवून अपघातग्रस्त तरुणाला मदत केली. धनंजय मुंडे यांनी त्या तरुणाचा हात पकडून तो शुद्धीत असल्याची खात्री केली, आपले नाव महेश असल्याचे सांगत त्या तरुणाने तो परळीतील पांगरी इथला असल्याचं सांगितलं.

धनंजय मुंडेंचा फोन आणि रुग्णवाहिका दोन मिनिटात हजर

अपघातग्रस्त तरुणाच्या डोक्याला गंभीर जखम झालेली होती, ते पाहून धनंजय मुंडे यांनी तात्काळ आपल्या स्वीय सहाय्यकांना, पोलीस आणि रुग्णवाहिका बोलावण्यासाठी फोन लावायला लावला, धनंजय मुंडे यांनी स्वतः बोलल्यानंतर अगदी दोनच मिनिटात रुग्णवाहिका घटनास्थळी हजर झाली. धनंजय मुंडे यांनी सदर तरुणाला अंबाजोगाई येथील स्वामी रामानंद तीर्थ वैद्यकीय महाविद्यालय रुग्णालयात दाखल करण्याचा सूचना दिल्या. तसंच रुग्णालय प्रशासनाला देखील याबाबत दक्षता घेण्याबाबत सूचना दिल्या.

कुटुंबाला धीर आणि रुग्णालयात जाण्याची व्यवस्था

अपघात झालेल्या तरुणाला अंबाजोगाईकडे रवाना केल्यानंतर घटनेची माहिती अपघातग्रस्त तरुणाच्या कुटुंबाला मिळाली. त्यांनी घटनास्थळाकडे धाव घेतली असता, धनंजय मुंडे यांची रस्त्यात भेट झाली, तेव्हा ताई तुम्ही काळजी करू नका, सावकाश अंबाजोगाईला जा, तो बरा आहे, शुद्धीवर आहे, बोलतोय, रुग्णालयात देखील मी बोललो आहे, अशी माहिती देऊन त्यांना धीर दिला. तसंच त्या तरुणाच्या कुटुंबियांना अंबाजोगाईला जाण्यासाठी वाहनाची व्यवस्था करून दिली.