…. तेव्हा मी राष्ट्रवादीचा झालो, दिलीप सोपलांनी बाळासाहेबांची आठवण सांगितली

सोलापूर : आगामी विधानसभा निवडणुकीच्या पार्श्वभूमीवर शिवसेनेचा (Shiv sena) निर्धार मेळावा सोलापुरात पार पडला. यावेळी पूर्वाश्रमीचे शिवसेनेचे नेते आणि माजी आमदार दिलीप सोपल (Dilip Sopal) यांनी प्रथमच जिल्ह्यातील शिवसेनेच्या कार्यक्रमाला हजेरी लावली.  त्यांनी नेहमीप्रमाणे आपल्या शैलीत भाषण केलं.

पक्षात जास्त काम करणाऱ्याचे तिकीट कापले जाते, त्यामुळे मी चिन्ह बदलल्याशिवाय निवडून येतंच नाही, असं दिलीप सोपल (Dilip Sopal) म्हणाले. एकच चिन्ह रिपीट झालं की पडतो. त्यामुळे मी चिन्ह बदलत बदलत इथपर्यंत आलो, अशी मिश्किल टोलेबाजी सोपलांनी केली.

“कधी कधी माझं तिकीट कटलं गेलं. मग मी कटलं तर कटलं आपलं पाप फिटलं असं म्हणत काम करत राहिलो. लोकांचं चिन्ह नीट असेल तर आपलं चिन्ह व्यवस्थित असतं. जीवनात अनेक कटू आठवणी असतात, मात्र त्या उगाळत बसायच्या नसतात. एक पक्ष सोडून दुसऱ्या पक्षात आल्यानंतर आधीच्या लोकांना चांगलं- वाईट न बोलण्यात अर्थ नसतो”, असं सोपल म्हणाले.

संघटना मजबूत

“शिवसेना हे एक वेगळंच रसायन आहे. शिवसेनेच्या कार्यकर्त्यांना कोण आलं कोण गेलं याचं काहीच घेणे देणे नसते. बाळासाहेबांचे विचार आजही जिवंत. म्हणून कार्यकर्ते बाळासाहेबांच्या पाठीशी आहेत. अनेक भाकीत करणारे तोंडघशी पडले. मात्र अनेक संकटांना तोंड देत उद्धव ठाकरेंनी संघटना मजबूत ठेवली”, असंही दिलीप सोपल यांनी नमूद केलं.   

…. तेव्हा राष्ट्रवादीचा झालो

अपक्ष निवडणूक लढल्यानंतर मी शिवसेनेला साथ दिली. साहेबांची (बाळासाहेबांची) आणि माझी वेव्ह लेन्थ जुळते, हे काही जणांना आवडलं नाही. त्यामुळे मला कट केलं गेलं आणि मी राष्ट्रवादीचा झालो, असं दिलीप सोपल यांनी सांगितलं.

नखं काढून गुदगुल्या करतो

उद्धव ठाकरे मला म्हणाले तुम्ही टीका करताना चिमटा काढत नाही गुदगुल्या करता. मी म्हणालो मी नख काढून गुदगुल्या करतो आणि नंतर चिमटाही घेतो, असं सोपल म्हणताच एकच हशा पिकला.