आताच्या घडीतील सर्वात मोठी बातमी, एकनाथ शिंदे यांची गाडी बदलली, मुख्यमंत्र्यांच्या अयोध्या दौऱ्यादरम्यान मोठ्या घडामोडी
मुख्यमंत्री एकनाथ शिंदे यांच्या अयोध्या दौऱ्याच्या पार्श्वभूमीवर अनेक महत्त्वाच्या घडामोडी घडताना दिसत आहेत. उत्तर प्रदेश सरकारकडून एकनाथ शिंदे यांच्या स्वागतासाठी जय्यत तयारी करण्यात आलीय. उद्या एकनाथ शिंदे यांचं अयोध्येत जंगी स्वागत होणार आहे. पण त्याआधी एक महत्त्वाची बातमी समोर आली आहे.
मुंबई : मुख्यमंत्री एकनाथ शिंदे (Eknath Shinde) आपल्या पक्षाच्या सर्व आमदार-खासदारांसह अयोध्या (Ayodhya) दौऱ्यासाठी रवाना झाले आहेत. सर्वजण आज संध्याकाळी पाचच्या सुमारास मुंबई विमानतळाहून लखनौच्या दिशेला रवाना झाले. त्यांच्या स्वागतासाठी लखनौ विमानतळावर योगी सरकारकडून विशेष तयारी करण्यात आलीय. एक विशेष बँड पथक लखनौ विमानतळावर सज्ज करण्यात आलं. मुख्यमंत्र्यांच्या अयोध्या दौऱ्याच्या पार्श्वभूमीवर अतिशय वेगाने घडामोडी घडत आहेत. या घडामोडींना आज दुपारपासून सुरुवात झाली आहे. तसेच या घडामोडी उद्या दिवसभर सुरुच राहणार आहेत. या घडामोडी दरम्यान एक मोठी बातमी समोर आली आहे.
मुख्यमंत्री एकनाथ शिंदे यांच्या अयोध्या दौऱ्याच्या पार्श्वभूमीवर त्यांच्या सुरक्षेत वाढ करण्यात आली आहे. सुरक्षेच्या कारणास्तव मुख्यमंत्र्यांची गाडी बदलण्यात आली आहे. सूत्रांकडून मिळालेल्या माहितीनुसार, उत्तर प्रदेश सरकारकडून मुख्यमंत्री एकनाथ शिंदे यांना बुलेटप्रुफ कार देण्यात आलीय. एकनाथ शिंदे यांच्या ताफ्यात पोलीस बंदोबस्तातही वाढ करण्यात आली आहे. मुख्यमंत्र्यांच्या संपूर्ण आयोध्या दौऱ्यात त्यांच्यासोबत शेकडो पोलीस असणार आहेत. विशेष म्हणजे एकनाथ शिंदे यांच्या अयोध्या दौऱ्याच्या पार्श्वभूमीवर आज सकाळपासूनच अयोध्येत पोलिसांचा मोठा फौजफाटा तैनात करण्यात आलाय.
भाजप नेतेही मुख्यमंत्र्यांसोबत अयोध्येला
या सगळ्या घडामोडी घडत असताना भाजपच्या गोटातही महत्त्वाच्या घडामोडी घडत आहेत. एकनाथ शिंदे यांनी भाजप नेत्यांना देखील अयोध्या दौऱ्याचं निमंत्रण दिलं आहे. त्यांचं हे निमंत्रण राज्याचे महसूल मंत्री राधाकृष्ण विखे पाटील यांनी स्वीकारलं आहे. त्यामुळे ते सोलापूरहून लखनौच्या दिशेला रवाना झाले आहेत. विशेष म्हणजे ते सुद्धा मुख्यमंत्री एकनाथ शिंदे यांच्यासोबत लखनऊवरून अयोध्येत जाणार आहेत. तसेच राधाकृष्ण विखे पाटील हे श्रीराम मंदिर येथील महाआरतीत देखील मुख्यमंत्र्यांच्या सोबत उद्या सहभागी होणार आहेत. याशिवाय उपमुख्यमंत्री देवेंद्र फडणवीसही अयोध्या दौऱ्याला जाण्याची शक्यता आहे.
मुख्यमंत्र्यांच्या स्वागतासाठी यूपीचे मंत्री लखनौ विमानतळावर
दरम्यान, मुख्यमंत्री एकनाथ शिंदे यांच्या स्वागतासाठी लखनौ विमानतळावर उत्तर प्रदेशचे मंत्री स्वतंत्रदेव सिंह आले. त्यांनी एकनाथ शिंदे लखनौला दाखल होण्याआधी ‘टीव्ही 9 मराठी’ला प्रतिक्रिया दिली. एकनाथ शिंदे हे मुख्यमंत्री झाल्यानंतर गरिब कल्याणाच्या योजना सुरु आहेत, महाराष्ट्रात कायदा-सुव्यवस्था आहे. त्यांचं आज उत्तर प्रदेशात स्वागत होत आहे. ते मुख्यमंत्री बनल्यानंतर पहिल्यांदाच अयोध्येत येत आहेत. ते उद्या प्रभू रामचंद्रांच्या चरणी माथा ठेवून लीन होणार आहेत, अशी प्रतिक्रिया मंत्री स्वतंत्रदेव सिंह यांनी दिली.
“स्वागतासाठी उत्तर प्रदेश सरकारच्या वतीने मला इथे पाठवण्यात आलं आहे. मी उत्तर प्रदेश सरकारच्या वतीने त्यांचं मनापासून स्वागत करतो. उद्या एकनाथ शिंदे आणि यूपीचे मुख्यमंत्री योगी आदित्यनाथ यांची भेट होईल. त्यांच्या भव्य स्वागताची तयारी करण्यात आली आहे”, असं मंत्री स्वतंत्रदेव सिंह यांनी सांगितलं.
