Tukaram Mundhe : साहेब मी तुमच्याच जातीचा… कारवाईतून बचावासाठी थेट तुकाराम मुंढेंना फोन, FDA आयुक्तांनी उलगडला थरारक किस्सा

FDA आयुक्त तुकाराम मुंढे हे त्यांच्या धडक कारवायांमुळे चर्चेत असतात. दिवाळीपूर्वीही विभागाने अनेक ठिकाणी धाडी टाकून अनेक कारवाया करत अटक आणि माल जप्त केला आहे. भेसळयुक्त खाद्यपदार्थांविरोधातील त्यांच्या धडाकेबाज कारवायांचं कौतुक आणि चर्चा फक्त महाराष्ट्रातच नाही तर ती देशभरात होत आहे. दरम्यान मुंढेंनी एक पहिल्या पोस्टिंगमधला किस्सा सांगितला आहे. जो सध्या चांगलाच व्हायरल झाला आहे.

तुम्हाला कधी कोणी पैसे म्हणजे लाच देण्याचा प्रयत्न केला का? या प्रश्नावर बोलताना तुकाराम मुंढे यांनी सांगितलं की, २००७ मध्ये मला पहिल्या पोस्टिंगमध्ये सहाय्यक जिल्हाधिकारी असताना असा प्रकार घडला होता. तेव्हा रेशन धान्याची तस्करी करणारा ट्रक रात्रभर पाळत ठेवून पकडलेला. त्यानंतर दुसऱ्या दिवशी माक्ष एका व्यक्तीने फोन करुन अप्रोच करण्याचा प्रयत्न केला होता, असा थरारक किस्सा त्यांनी सांगितला.

लोकमतच्या मुलाखतीत बोलताना तुकाराम मुंढे यांनी हा किस्सा सांगितला आहे. ते म्हणाले की, मला आत्तापर्यंत कोहीही पैसे देण्याची ऑफर केलेली नाही. पण अप्रोच करण्याचा प्रयत्न मात्र झाला होता, तेव्हा मलाही धक्का बसलेला, असं त्यांनी सांगितलं. मला देगलूरला पोस्टिंगवर असताना टीप मिळालेली. त्यानंतर मी माझा चालक आणि तलाठी आम्ही त्याठिकाणी जाऊन रात्रभर पाळत ठेवून रेशनच्या तस्करीचा ट्रक पकडलेला. त्यामध्ये गहू, तांदूळ होते. आम्ही तो कार्यालयात आणून लावला.

दुसऱ्या दिवशी मला फोन आला. कार्यलयात बसल्यानंतर हा फोन ऐकून मी थक्क झालो. तो साहेब मी तुमच्याच जातीचा आहे, असं तो व्यक्ती बोलत होता. मी त्या व्यक्तीला सांगितलं मी तुम्हाला ओळखत नाही. नंतर तो म्हणाला की तुम्ही गाडी पकडली ती माझी आहे. माझी मदत करा, खरंतर मला जात ही गोष्टच पटत नाही. त्यानंतर मी त्याला म्हटलं की, तुम्ही फोन केला पण समोर या मग काय मदत करायची ती करतो असं मी मोठ्या आवाजात बोलताच त्या व्यक्तीने फोन कट केला. त्यानंतर आम्ही त्या व्यक्तीवर गुन्हा दाखल केला आणि कायदेशीर कारवाई केल, त्याचवेळी ही एकमेव घटना आहे, असंही मुंढेंनी नमूद केलं.