मनसेत महाअधिवेशनापूर्वी इनकमिंग, राज ठाकरेंच्या उपस्थितीत पक्षप्रवेश

मुंबई : महाराष्ट्र नवनिर्माण सेनेच्या महाअधिवेशनाच्या तोंडावर पक्षात जोरदार इनकमिंगला सुरुवात झाली आहे. जोगेश्वरीतील प्रसिद्ध ‘जय जवान दहिहंडी पथका’तील कार्यकर्त्यांनी मनसे अध्यक्ष राज ठाकरेंच्या उपस्थितीत पक्षप्रवेश (MNS Incoming in presence of Raj Thackeray) केला.

राज ठाकरे यांचं निवासस्थान ‘कृष्णकुंज’वर अनेक कार्यकर्त्यांनी मनसेचा झेंडा हाती घेतला. यावेळी ठाण्याचे मनसे जिल्हाध्यक्ष अविनाश जाधवही उपस्थित होते. मनसेच्या महाअधिवेशनाच्या पार्श्वभूमीवर मोठ्या प्रमाणावर पक्षप्रवेश होण्याचा दावा मनसेकडून केला जात आहे.

दोनच दिवसांपूर्वी माजी आमदार हर्षवर्धन जाधव आणि भाजपचे दिवंगत नेते प्रमोद महाजन यांचे बंधू प्रकाश महाजन यांनी मनसेमध्ये पुनरागमनाचे संकेत दिले आहेत. मनसे सरचिटणीस संदीप देशपांडे आणि महाराष्ट्र नवनिर्माण चित्रपट सेनेचे अध्यक्ष अमेय खोपकर यांनी ट्विटरवरुन थेट शिवसैनिकांनाच मनसेत सहभागाचं आवताण दिलं आहे.

पोषक आहारासाठी राब राब राबलेल्या कार्यकर्त्यांच्या वाट्याला आली सपक महाखिचडी.. पण सच्च्या कार्यकर्त्यांनो,बाळासाहेबांच्या कडव्या शिवसैनिकांनो निराश होऊ नका… निर्लज्जपणे असाच सुरु राहील सत्तेचा खेळ मनसेचा झेंडा हाती घ्यायची हीच ती वेळ बाळासाहेबांच्या जयंतीला ‘मन से’ सामील व्हा

— Ameya Khopkar (@MNSAmeyaKhopkar) January 22, 2020

मंत्रालयातील गोड गोड अळूच फदफद आवडत की शेतावरची मिरची ठेचा आणि भाकरी निर्णय तुमचा…. ।। मराठा तितुका मेळावा। महाराष्ट्र धर्म वाढवावा ।।

— Sandeep Deshpande (@SandeepDadarMNS) January 21, 2020

जानेवारी महिन्याच्या सुरुवातीलाच शिवसेना-युवासेना आणि राष्ट्रवादीच्या वेगवेगळ्या विभागातील कार्यकर्ते आणि पदाधिकाऱ्यांनी मनसेचा झेंडा हाती धरला होता. यामध्ये रायगडमधील पेण, मुरुड भागातील कार्यकर्त्यांचा मोठ्या प्रमाणात समावेश होता. याशिवाय विविध शहरं, तालुक्यांतील पदाधिकाऱ्यांनीही मनसेची वाट धरली आहे.

स्थानिक नेत्यांची मनमानी, मान-सन्मान किंवा पद मिळत नाही, वरिष्ठ नेत्यांसमोर समस्या मांडूनही होणारं दुर्लक्ष यासारख्या कारणांमुळे सेना-राष्ट्रवादीच्या पदाधिकारी आणि कार्यकर्त्यांच्या मनात खदखद होती. अखेर ती पक्षांतराच्या रुपाने बाहेर पडली.

शिवसेनाप्रमुख बाळासाहेब ठाकरे यांच्या जयंतीला (उद्या, 23 जानेवारी)  मनसेचं महाअधिवेशन आयोजित करण्यात आलं आहे. गोरेगावमध्ये सकाळी नऊ वाजता मनसेचं पहिलं राज्यव्यापी अधिवेशन बोलावण्यात आलं आहे. यावेळी मनसे पक्षाचा झेंडा आणि अजेंडा बदलण्याच्या तयारीत असल्याचीही चर्चा आहे.

मनसेचा नवा झेंडा भगव्या रंगाचा असणार आहे. यावर सोनेरी रंगाच्या षटकोनात राजमुद्रेप्रमाणे महाराष्ट्र धर्म लिहिलं असल्याची शक्यता आहे. सुलेखनकार अच्युत पालव यांनी हे डिझाईन केले आहे.

MNS Incoming in presence of Raj Thackeray