…तर भाजप लॉन्ड्रीचं स्वागतच, सुप्रिया सुळेंचा बावनकुळेंवर जोरदार निशाणा
भाजप प्रदेशाध्यक्ष चंद्रशेखर बावनकुळे यांच्या टीकेला राष्ट्रवादीच्या नेत्या खासदार सुप्रिया सुळे यांनी जोरदार प्रत्युत्तर दिले आहे.
मुंबई : भाजप प्रदेशाध्यक्ष चंद्रशेखर बावनकुळे (Chandrasekhar Bawankule) यांच्या टीकेला राष्ट्रवादीच्या (NCP) नेत्या खासदार सुप्रिया सुळे (Supriya Sule) यांनी जोरदार प्रत्युत्तर दिले आहे. बारामती हवीशी वाटत असेल तर भाजप लॉन्ड्रीचं स्वागतच असल्याचं त्यांनी म्हटलं आहे. एवढचं नव्हे तर तुम्ही माझ्या सोबत चला मी तुम्हाला मतदारसंघातील प्रत्येक तालुका दाखवते, तसेच निवडणुकीत किती खर्च झाला याची देखील ऑनलाईन माहिती उपलब्ध आहे, असे म्हणत सुप्रिया सुळे यांनी बावनकुळेंना आव्हान दिले आहे.
नेमकं काय म्हणाल्या सुळे?
सुळे यांनी चंद्रशेखर बावनकुळे यांच्या वक्तव्याचा चांगलाच समाचार घेतला आहे. आम्ही महाराष्ट्रात लोकसभेच्या 45 जागा जिंकणार त्यामध्ये सर्वात पहिला बारामती मतदारसंघ असेल असं बावनकुळे यांनी म्हटलं होतं. बावनकुळे यांच्या या टीकेला सुप्रिया सुळे यांनी प्रत्युत्तर दिले आहे.
बारामती हवीशी वाटत असेल तर भाजप लॉन्ड्रीचं स्वागतच असल्याचं त्यांनी म्हटलं आहे. पुढे बोलताना त्या म्हणाल्या की, माझ्या सोबत चला मी तुम्हाला मतदारसंघातील प्रत्येक तालुका दाखवते, तसेच निवडणुकीत किती खर्च झाला याची देखील ऑनलाईन माहिती उपलब्ध आहे. प्रत्येकाला चांगल्या कॉलेजमध्ये प्रवेश घ्यायचा असतो, पण तो प्रत्येकाला मिळत नाही. जर भाजपाला बारामती हवी असेल तर याचा अर्थ आम्ही पास झालो असा होतो, असा टोला सुप्रिया सुळे यांनी लगावला आहे.
बावनकुळेंचा दावा काय?
बावनकुळे यांनी असा दावा केला आहे की, आम्ही येत्या लोकसभा निवडणुकीमध्ये 45 जागा जिंकू, त्यामध्ये बारामती पहिल्या स्थानावर असेल. एवढचं नव्हे तर पुढे बावनकुळे यांनी असंही म्हटलं आहे की, बारामतीचा विषय निघाल्यानंतर आता सुप्रिया सुळे रोज 25 गावांना भेटी देत आहेत. बावनकुळेंच्या टीकेचा सुप्रिया सुळे यांनी जोरदार समाचार घेतला आहे.
