12 की 13 नोव्हेंबर, तुळशी विवाह नेमका कधी? जाणून घ्या तारीख, शुभ मुहूर्त अन् सर्व माहिती…
दिवाळी झाल्यानंतर देवउठणी एकादशीच्या दिवशी तुळशीविवाह साजरा केला जातो. या दिवसाला देवोत्थान एकादशी किंवा प्रबोधिनी एकादशी असे म्हणतात. चला तर मग तुळशी विवाहाची तारीख, मुहूर्त आणि महत्त्व जाणून घेऊयात.
दिवाळी झाल्यानंतर देवउठणी एकादशीच्या दिवशी तुळशीविवाह साजरा केला जातो. या नंतर लग्नसराईला सुरुवात होते. देवउठणी एकादशीच्या दिवशी भगवान विष्णू चार महिन्यांनी योगनिद्रातून जागे होतात आणि या दिवसापासून चातुर्मास संपतो. या दिवसाला देवोत्थान एकादशी किंवा प्रबोधिनी एकादशी असे म्हणतात. चला तर मग तुळशी विवाहाची तारीख, मुहूर्त आणि महत्त्व जाणून घेऊयात.
तुळशी विवाह सोहळ्याची तारीख
यंदा तुळशी विवाह १३ नोव्हेंबर २०२४ रोजी पार पडणार आहे. एक दिवस अगोदर म्हणजे १२ नोव्हेंबरला देवउठनी एकादशी चातुर्मासाची सांगता आहे. या दिवशी भगवान विष्णूचा तुळशीशी शालिग्राम स्वरूपात विवाह करण्याची ही परंपरा आहे.
तुळशी विवाह २०२४ मुहूर्त
पंचांगानुसार कार्तिक महिन्याच्या शुक्ल पक्षाची द्वादशी तिथी १२ नोव्हेंबर २०२४ रोजी दुपारी ०४ वाजून ०४ मिनिटांनी सुरू होईल आणि दुसऱ्या दिवशी १३ नोव्हेंबर २०२४ रोजी दुपारी ०१ वाजून ०१ मिनिटांनी संपेल.
देवउठणी एकादशीला तुळशी विवाह मुहूर्त
मान्यतेनुसार काही लोकं देवउठणी एकादशीच्या संध्याकाळी तुळशी आणि शालिग्रामच्या विवाहाची परंपरा पार पाडतात. या दिवशी तुळशी विवाहाचा मुहूर्त सायंकाळी ०५वाजून २९ मिनिटांनी सुरु होऊन ०५ वाजून ५५ मिनिटांनी संपेल.
तुळशी विवाहाचे महत्व
हिंदू धर्मात कन्यादानाला महादानाच्या श्रेणीत स्थान देण्यात आले आहे. असे मानले जाते की जे लोकं तुळशी विवाहाची परंपरा पाळतात, त्यांना कन्यादानासारखेच फळ मिळते. तुळशीविवाह घराच्या अंगणात करावा. यासाठी सूर्यास्तानंतरची संध्याकाळची वेळ निवडा. असे मानले जाते की ज्या घरात शालिग्राम जी (भगवान विष्णु) आणि तुळशी मातेचा विवाह होतो त्या घरात लक्ष्मीचा वास असतो.
विष्णूने तुळशीशी विवाह का केला?
पौराणिक कथेनुसार, एकेकाळी राक्षसांचा राजा जालंधर याने तिन्ही लोकांमध्ये दहशत निर्माण केली होती. पत्नी वृंदाच्या एकनिष्ठ असल्यामुळे तो अजिंक्य होता. असे म्हणतात की यामुळे भगवान विष्णूने एक युक्ती केली आणि जालंधरचे रूप धारण केले. वृंदाने आपल्या पत्नीशी निष्ठा ठेवण्याचे व्रत मोडले गेले, परिणामी जालंधर भगवान शिवाच्या हातून मारला गेला.
पवित्रतेचे व्रत मोडून आणि अपवित्र झाल्यानंतर, वृंदाने प्राण त्याग केला. त्यानंतर भगवान विष्णूला दगड बनण्याचा शापही दिला. भगवान विष्णूच्या या रूपाला ‘शाळीग्राम’ म्हणतात. वृंदाने प्राण त्याग केलेल्या ठिकाणी तुळशीचे रोप दिसले. भगवान विष्णूंनी वरदान दिले की तुळशीचा विवाह त्यांच्या शालिग्राम रुपाशी होईल आणि तुळशीशिवाय त्यांची पूजा अपूर्ण राहील. तेव्हापासून विष्णूच्या रूपातील शालिग्रामचा विवाह वृंदा म्हणजेच तुळशीशी होतो.
