BCCI Rule: रोहित-विराटला खटकलं अन् बीसीसीआयने नियमच बदलला, 10 संघांना तातडीने आदेश दिला

BCCI Rule About Impact Player: २०२३ च्या आयपीएल हंगामात ‘इम्पॅक्ट प्लेयर’ नियम लागू करण्यात आला. या नियमानुसार, एक संघ सामन्यादरम्यान आपल्या अंतिम ११ खेळाडूंमधून एक खेळाडू बदलू शकत होता. याचा अर्थ एकाच सामन्यात १२ खेळाडू खेळत होते. यामुळे संघांच्या फलंदाजीचा डाव लांबला, ज्यामुळे फलंदाजांना निर्भयपणे फलंदाजी करता येऊ लागली. यामुळे अष्टपैलू खेळाडूंची भूमिकाही कमी झाली. यामुळे या नियमाबद्दल सातत्याने प्रश्न उपस्थित केले जात आहेत.

रोहित शर्मा आणि विराट कोहलीसारख्या खेळाडूंनीही या नियमाविरोधात आवाज उठवला आहे. आयपीएल २०२७ ला अजून काही काळ बाकी आहे, पण हा नियम आधीच चर्चेचा विषय बनला आहे. बीसीसीआयने अलीकडेच ‘इम्पॅक्ट प्लेयर’ नियम आणि इतर नियमांसंदर्भात सर्व फ्रँचायझींना एक अधिकृत पत्र पाठवले आहे. त्यांना ३१ ऑगस्टपर्यंत प्रतिसाद देण्यास सांगितले आहे.

क्रिकबझच्या वृत्तानुसार, त्यात म्हटले आहे की, “आयपीएल २०२६ च्या कर्णधारांच्या बैठकीत झालेल्या चर्चेनुसार, स्पर्धा संपल्यानंतर सर्व फ्रँचायझींकडून क्रिकेटशी संबंधित महत्त्वाच्या बाबींवर अभिप्राय मागवला जाईल, असे ठरवण्यात आले होते. त्यामुळे, आम्ही तुम्हाला विनंती करतो की तुम्ही तुमच्या क्रिकेट ऑपरेशन्स टीमसोबत या मुद्द्यांवर चर्चा करा आणि तुमचा एकत्रित अभिप्राय आमच्यासोबत शेअर करा.

पत्रात पुढे म्हटले आहे, “कृपया खात्री करा की तुमचा अभिप्राय ३१ ऑगस्टपर्यंत आमच्यापर्यंत पोहोचेल. यामुळे आम्हाला सर्व फ्रँचायझींकडून माहिती गोळा करण्यास आणि पुढील हंगामापूर्वी आवश्यक रिव्हयू व कृती योजना तयार करण्यास मदत होईल. आम्ही निर्धारित वेळेत तुमच्याकडून प्रतिसाद मिळण्याची अपेक्षा करतो.”

इमपॅक्ट खेळाडूंव्यतिरिक्त, बीसीसीआयने फ्रँचायझींकडून सामन्याच्या दिवसाचे कामकाज, पंचगिरी, सराव सत्रे, खेळाची परिस्थिती आणि पीएमओए (खेळाडू आणि सामना अधिकारी क्षेत्र) यांच्याशी संबंधित बाबींवरही सूचना मागवल्या आहेत. गेल्या हंगामात, पीएमओएमध्ये अनधिकृत प्रवेशाची प्रकरणे समोर आली होती, ज्यामुळे बीसीसीआयला हंगामाच्या मध्यात खेळाडू, सपोर्ट स्टाफ आणि संघ मालकांसाठी मार्गदर्शक तत्त्वे जारी करावी लागली होती.