मोठी बातमी! टीम इंडियाला झटका, विराट कोहली वनडे मॅचमधून बाहेर

भारतीय क्रिकेट संघाबाबात एक मोठी अपडेट समोर आली आहे. १९ मे रोजी अफगाणिस्तानविरुद्धच्या मालिकेसाठी रोहित शर्मासोबत विराट कोहलीची वनडे संघात निवड करण्यात आली होती. ते ऐकून चाहत्यांना आनंद झाला होता. आता भारतीय संघाला मोठा झटका बसला आहे. विराट कोहली संघातून बाहेर पडला आहे. पीटीआयने (PTI) बीसीसीआयच्या (BCCI) सूत्रांच्या हवाल्याने या बातमीची माहिती दिली आहे. रिपोर्टमध्ये असे सांगण्यात आले आहे की, विराट कोहलीला हॅमस्ट्रिंगची दुखापत झाली आहे, ज्यामुळे तो अफगाणिस्तानविरुद्धच्या वनडे मालिकेत खेळताना दिसणार नाही. मात्र, याबाबत अधिकृत निवेदन येणे अद्याप बाकी आहे.

१९ मे रोजी संघात निवड, ४ जूनला बाहेर!

अफगाणिस्तानविरुद्धच्या मालिकेसाठी टीम इंडियाची घोषणा १९ मे रोजी करण्यात आली होती. यामध्ये रोहित शर्मासोबत विराट कोहलीचीही वनडे संघात निवड झाली होती. पण, पीटीआयच्या वृत्तानुसार विराट कोहली आता अफगाणिस्तानविरुद्ध खेळताना दिसणार नाही. बीसीसीआयशी संबंधित सूत्रांनी पीटीआयला सांगितले की, हॅमस्ट्रिंगच्या दुखापतीमुळे तो या मालिकेत खेळू शकणार नाही.

भारत-अफगाणिस्तान वनडे मालिकेचे वेळापत्रक

भारत आणि अफगाणिस्तान यांच्यातील ३ सामन्यांच्या वनडे मालिकेची सुरुवात १३ जूनपासून होणार आहे. पहिला वनडे सामना धर्मशाला येथे खेळवला जाईल. दुसरा वनडे सामना १७ जूनला लखनौमध्ये खेळवला जाईल. तर २० जूनला दोन्ही संघ तिसरा वनडे सामना चेन्नईच्या मैदानावर खेळतील.

दुखापतीमुळे विराट बाहेर! चाहत्यांची प्रतीक्षा वाढली

विराट कोहलीने नुकतेच आरसीबीला (RCB) सलग दुसऱ्यांदा आयपीएल २०२६ चे (IPL 2026) विजेतेपद मिळवून देण्यात मदत केली होती. ६७५ धावांसह तो या लीगमध्ये आरसीबीचा सर्वात यशस्वी फलंदाज ठरला होता. बऱ्याच काळानंतर विराटला वनडे खेळताना पाहण्याची प्रत्येक क्रिकेट चाहत्याची प्रतीक्षा होती. पण, हॅमस्ट्रिंगच्या दुखापतीने विराटच्या चाहत्यांची ती प्रतीक्षा आणखी वाढवली आहे.

रोहित शर्माचे काय होणार?

विराट कोहली वनडे मालिकेतून बाहेर पडल्याची बातमी समोर आल्यानंतर आता सर्वांच्या नजरा रोहित शर्मावर खिळल्या आहेत. रोहित देखील फिटनेसच्या समस्येशी झगडत आहे. अशा परिस्थितीत मोठा प्रश्न हा आहे की, तो अफगाणिस्तानविरुद्धची संपूर्ण मालिका खेळू शकेल का?