Match Fixing :मॅच फिक्सिंगच्या प्रकरणाने जगात खळबळ, दिग्गज खेळाडूवर धक्कादायक कारवाई; IPL सुरू होण्याआधीच…

Javon Searles Match Fixing : आयसीसी टी-20 विश्वचषक स्पर्धा संपली आहे. या स्पर्धेत भारताने बाजी मारली आहे. भारताने न्यूझीलंडला नमवत जेतेपदावर नाव कोरलं. आता ही स्पर्धा संपल्यानंतर आयपीएलच्या स्पर्धेची जगभरात चर्चा होत आहे. विशेष म्हणजे या स्पर्धेचे पहिल्या 15 दिवसांचे वेळापत्रकही समोर आले आहे. येत्या 28 मार्चपासून या स्पर्धेच्या समान्यांना सुरुवात होईल. पहिल्या टप्प्यात 12 एप्रिलपर्यंत हे सामने खेळवले जाणार आहेत. दरम्यान, एकीकडे आयपीएल सामन्याच्या या 19 व्या हंगामाची देशभरात चर्चा सुरू असताना संपूर्ण जगाला हेलावून टाकणारी क्रिकेट विश्वातील सर्वात मोठी बातमी समोर आली आहे. मॅच फिक्सिंगच्या आरोपाखाली एक खेळाडू दोषी ठरला असून त्याच्या विरोधात कठोर कारवाई करण्यात आली आहे.

नेमका आरोप काय, कोणत्या स्पर्धेत मॅच फिक्सिंगचे आरोप

वेस्टइंडिजचा गोलंदाज जेवॉन सियर्ल्स याच्यावर मॅच फिक्सिंगचा आरोप करण्यात आला होता. तो या आरोपात दोषी ठरला आहे. आयसीसीने या खेळाडूने अँटी करप्शन कोडचे उल्लंघन केल्याचा ठपका ठेवला आहे. 2023-24 साली Bim10 League ही स्पर्धा झाली होती. या स्पर्धेत जेवॉन या खेळाडूने भाग घेतला होता. ही स्पर्धा बार्बाडोस येथे आयोजित करण्यात आली होती. याच स्पर्धेदरम्यान त्याने मॅच फिक्सिंग केल्याचा आरोप करण्यात आला होता. जेवॉन सियर्ल्स याच्यासोबतच त्याच्या संघाच्या दोन अधिकाऱ्यांनाही मॅच फिक्सिंगच्या आरोपात दोषी ठरवून त्यांना निलंबित करण्यात आलं आहे.

आयपीएलमध्ये खेळलेला आहे जेवॉन

जेवॉन याने फिक्सिंगसाठी मिळालेल्या ऑफरबद्दल आयसीसी बोर्डाला माहिती दिली नाही. सोबतच भ्रष्टाचाराशी संबंधित प्रकरणाचा तपास करताना त्यांनी अँटी करप्शन युनिटवच्या चौकशीत त्याने बाधा निर्माण केली. चौकशीत त्याने महत्त्वाची माहिती लपवली, असा ठपका त्याच्यावर ठेवण्यात आला आहे. दरम्यान, आता त्याच्यावर बंदी घालण्यात आल्याने तो चर्चेत आला आहे. तो 39 वर्षांचा आहे. तो 2018 साली आयपीएलमध्येही खेळलेला आहे. कोलकाता नाईट रायडर्स या संघाकडून त्याने तीन सामने खेळलेले आहेत. त्याने या सामन्यांत 2 गडी बाद केले होते.