IND vs NEP : पाकिस्ताननंतर नेपाळचा धुव्वा, भारताची सेमी फायनलमध्ये धडक, आता कुणाशी सामना?
India A vs Nepal Womens : इंडिया ए वूमन्स टीमने राधा यादव हीच्या नेतृत्वात नेपाळला पराभूत करत सलग दुसरा विजय मिळवला. महिला ब्रिगेडने यासह उपांत्य फेरीत प्रवेश केला आहे.
भारताने 15 फेब्रुवारीला महाशिवरात्रीच्या पार्श्वभूमीवर डबल धमाका केला. टीम इंडियाने सूर्यकुमार यादव याच्या नेतृत्वात कट्टर प्रतिस्पर्धी पाकिस्तानचा धुव्वा उडवला. भारताने पाकिस्तानवर 61 धावांनी मात करत आयसीसी टी 20i वर्ल्ड कप 2026 स्पर्धेत आपला सलग आणि एकूण तिसरा विजय मिळवला. भारताने या विजयासह सुपर 8 मध्ये धडक दिली. त्याआधी रविवारी दुपारी मुंबईकर राधा यादव हीच्या नेतृत्वात इंडिया ए वूमन्स टीमने पाकिस्तानला पराभूत करत एमर्जिग आशिया कप 2026 स्पर्धेतील विजयाचं खातं उघडलं. त्याआधी महिला ब्रिगेडला यूएई विरुद्ध पराभूत झाल्याने उलटफेरचा सामना करावा लागला होता.
इंडियाच्या ए टीमने पाकिस्ताननंतर नेपाळला लोळवलं. महिला ब्रिगेडने मंगळवारी 17 फेब्रुवारीला नेपाळ टीमला पराभूत केलं. इंडिया ए टीमने यासह एमर्जिंग आशिया कप 2026 स्पर्धेच्या उपांत्य फेरीत अर्थात सेमी फायनलमध्ये धडक दिली आहे.
भारताचा 47 चेंडूत विजय
भारताच्या बाजूने नाणेफेकीचा कौल लागला. कॅप्टन राधा यादव हीने फिल्डिंगचा निर्णय घेत नेपाळला बॅटिंगसाठी भाग पाडलं. भारतीय गोलंदाजांनी राधा यादव हीचा फिल्डिंगचा निर्णय योग्य ठरवला. भारतीय गोलंदाजंनी नेपाळला 18 ओव्हरमध्ये 78 रन्सवर गुंडाळलं. भारतासाठी तनुजा कंवर हीने सर्वाधिक 4 विकेट्स मिळवल्या. मिन्नू मणी हीने तिघींना मैदानाबाहेरचा रस्ता दाखवला. तर कॅप्टन राधाने 2 विकेट्स मिळवत नेपाळचं पॅकअप करण्यात योगदान दिलं.
वृंदा गणेशची विजयी खेळी
भारताने त्यानंतर 79 धावांचं आव्हान हे 3 विकेट्सच्या मोबदल्यात पूर्ण केलं. भारताने 7.5 ओव्हरमध्ये 82 धावा केल्या.भारतासाठी वृंदा गणेश हीने सलग दुसऱ्या सामन्यात नाबाद आणि विजयी खेळी साकारली. वृंदाने पाकिस्तान विरुद्ध नाबाद अर्धशतक झळकावलं होतं. तर आता वृंदाने नेपाळ विरुद्ध सर्वाधिक आणि नाबाद 39 धावा केल्या. वृंदाने या 18 चेंडूंच्या खेळीत 9 चौकार लगावले. अनुष्का शर्मा हीने 10 धावांचं योगदान दिलं. तेजल हसबनीस हीने 18 धावा केल्या. तर राधा यादव हीने नाबाद 1 धाव करत भारताच्या विजयात बॅटिंगनेही योगदान दिलं.
पाकिस्तानचा उपांत्य फेरीत प्रवेश
दरम्या ए ग्रुपमधून भारतानंतर पाकिस्तानच्या ए टीमनेही उपांत्य फेरीत प्रवेश केला आहे. पाकिस्तानने यूएईला पराभूत करत सेमी फायनलचं तिकीट मिळवलंय. तर बी ग्रुपमधून बांगलादेशही सेमी फायनलमध्ये पोहचली आहे. आता या बी ग्रुपमधून थायलंड ए आणि श्रीलंका ए या दोघांपैकी कोणता संघ उपांत्य फेरीत प्रवेश मिळवणार? हे पाहणं महत्त्वाचं ठरणार आहे.
