DC vs CSK : चेन्नई सुपर किंग्स आणि दिल्ली कॅपिटल्स आमनासामना, कोणाचं पारडं जड? जाणून घ्या

आयपीएल 2026 स्पर्धेतील 18व्या सामन्यात चेन्नई सुपर किंग्स आणि दिल्ली कॅपिटल्स हे संघ आमनेसामने येणार आहेत. चेन्नई सुपर किंग्स आणि दिल्ली कॅपिटल्स यांच्यातील सामना 11 एप्रिल रोजी चेन्नई येथील एमए चिदंबरम स्टेडियमवर होणार आहे. हा सामना भारतीय वेळेनुसार सायंकाळी 7.30 वाजता सुरू होईल. हा सामना चेन्नई सुपर किंग्सच्या दृष्टीने खूपच महत्त्वाचा आहे. कारण आतापर्यंत झालेल्या तिन्ही सामन्यात पराभवाचं तोंड पाहावं लागलं आहे. त्यामुळे प्लेऑफचं गणित सोडावयचं असेल तर उर्वरित 11 पैकी 7 सामने जिंकणं भाग आहे. त्यासाठी हा सामना खूपच महत्त्वाचा आहे. दुसरीकडे, दिल्ली कॅपिटल्सने तीन सामने खेळले असून त्यापैकी दोन सामन्यात विजय आणि एका सामन्यात पराभवाचं तोंड पाहिलं आहे. गुणतालिकेत 4 गुणांसह दिल्ली कॅपिटल्सचा संघ चौथ्या स्थानावर आहे. तर चेन्नई सुपर किंग्सचा संघ तळाशी म्हणजेच दहाव्या स्थानावर आहे.

चेन्नई सुपर किंग्स आणि दिल्ली कॅपिटल्स हेड टू हेड

आयपीएल स्पर्धेत दोन्ही संघ 31 वेळा एकमेकांसमोर ठाकले आहेत. मागचा इतिहास पाहता चेन्नई सुपर किंग्सचं पारडं जड आहे. पण यंदा स्पर्धतील कामगिरी पाहता दिल्ली कॅपिटल्स संघ वजनदार आहे. चेन्नई सुपर किंग्सने 31 पैकी 19 सामन्यात विजय मिळवला आहे, तर दिल्ली कॅपिटल्सने 12 सामन्यात विजय मिळवला आहे. दोन्ही संघात 2025 मध्ये चेपॉकवर आमनासामना झाला होता. हा सामना दिल्ली कॅपिटल्सने 25 धावांनी जिंकला होता.आयपीएल 2024 मध्येही दोन्ही संघ आमनेसामने आले हेतो. तेव्हा दिल्ली कॅपिटल्सने हा सामना 20 धावांनी जिंकला होता. चेन्नई सुपर किंग्सने दिल्ली कॅपिटल्सला शेवटचं 2023 मध्ये पराभूत केलं होतं. चेपॉकमध्ये नाणेफेकीचा कौल हा महत्त्वाचा ठरणार आहे. कारण संध्याकाळी दव पडतं आणि धावसंख्येचा पाठलाग करणं सोपं होतं. नाणेफेक जिंकणारा कर्णधार प्रथम गोलंदाजी करण्याचा निर्णय घेईल, यात शंका नाही.

दुसरीकडे, आयपीएलच्या इतिहासात चेन्नई सुपर किंग्सने पाचवेळा जेतेपदावर नाव कोरलं आहे. पण दिल्ली कॅपिटल्स अजूनही पहिल्या जेतेपदाच्या प्रतीक्षेत आहे. पण यंदाची चेन्नई सुपर किंग्सची स्थिती पाहता प्लेऑफचा मार्ग प्रत्येक पराभवानंतर किचकट होत जाणार आहे. त्यामुळे या सामन्यात विजयाचा दबाव हा पूर्णपणे चेन्नई सुपर किंग्सवर असणार आहे.