GT vs KKR: कोलकात्याची अस्तित्वाची लढाई, तर गुजरात विजयी ट्रॅकसाठी आग्रही; अशी आहे आकडेवारी

आयपीएल 2026 स्पर्धेच्या 25व्या सामन्यात कोलकात नाईट रायडर्स आणि गुजरात टायटन्स हे संघ आमनेसामने येणार आहेत. हा सामना शुक्रवारी, 17 एप्रिल रोजी अहमदाबादच्या नरेंद्र मोदी स्टेडियमवर खेळला जाणार आहे. या सामन्यात स्पर्धेतील कामगिरी पाहता गुजरात टायटन्सचा वरचष्मा दिसत आहे. गुजरात टायटन्सने चार पैकी 2 सामन्यात विजय मिळवला आहे. तर केकेआरने पाच पैकी 4 सामन्यात पराभवाचं तोंड पाहिलं आहे. एक सामना पावसामुळे रद्द झाल्याने एक गुण मिळाला आहे. सुमार कामगिरी केल्याने गुणतालिकेत केकेआर संघ तळाशी आहे. तर गुजरात टायटन्सने दोन विजयासह 4 गुण मिळवले आहेत. तर -0.029 नेट रनरेटसह सहाव्या स्थानावर आहे. त्यामुळे दोन्ही संघांना या सामन्यात विजय महत्त्वाचा आहे.

दोन्ही संघातील हेड टू हेड आकडेवारी

आयपीएल स्पर्धेत कोलकाता नाईट रायडर्स यांच्यात पाच सामने झाले असून त्यापैकी एका सामन्याचा निकाल लागला नाही. तर चार सामन्यांमध्ये गुजरात टायटन्सने तीन सामने जिंकले आहेत, तर कोलकाता नाइट रायडर्सला फक्त एकच सामना जिंकता आला आहे. 2022 मध्ये गुजरात टायटन्स आणि केकेआर पहिल्यांदा भिडले होते. तेव्हा हा सामना गुजरात टायटन्सने 8 धावांनी जिंकला होता. त्यानंतर 2023 मध्ये या दोन संघात दोन सामने झाले. यापैकी पहिल्या सामन्यात केकेआर 3 विकेटने जिंकली, तर दुसऱ्या सामन्यात गुजरात टायटन्सने 7 विकेट राखून मात दिली. 2024 मधील सामना पावसामुळे रद्द झाला. तर मागच्या पर्वात गुजरात टायटन्सने केकेआरला 39 धावांनी पराभूत केलं होतं.

खेळपट्टीचा अहवाल

अहमदाबादमधील नरेंद्र मोदी स्टेडियममधील खेळपट्टी फलंदाजीसाठी चांगलं मानलं जतं. पण सामना पुढे सरकत असताना ही खेळपट्टी संथ होते. त्यामुळे थावांचा पाठलाग करणं कठीण होतं. पण दव फॅक्टरचा विचार केला तर गोलंदाजीतही अडचण येते. त्यामुळे या सामन्यात पहिल्या डावात चांगली धावसंख्या करणारा संघ विजयाच्या वेशीवर पोहचू शकतो. भारतीय वेळेनुसार हा सामना 7.30 वाजता सुरू होणार आहे. तर नाणेफेकीचा कौल हा 7 वाजता असेल. आता या सामन्यात नाणेफेकीचा कौल कोणाच्या बाजूने लागतो आणि कोण बाजी मारतो हे पाहणं औत्सुक्याचं ठरेल.