IPL 2026, RCB vs SRH: स्पर्धेच्या सुरूवातीलाच आरसीबीला मोठा धक्का, स्टार खेळाडू आऊट
आयपीएल 2026 स्पर्धेला सुरूवात होण्यासाठी अवघे काही तास शिल्लक आहेत. पहिलाच सामना रॉयल चॅलेंजर्स बंगळुरू आणि सनरायझर्स हैदराबाद यांच्यात होत आहे. या सामन्यापूर्वी आरसीबीच्या गोटात चिंतेचं वातावरण आहे. त्याला कारणही तसंच आहे.
IPL 2026, RCB vs SRH: आयपीएल 2026 स्पर्धेतील पहिला सामना गतविजेता रॉयल चॅलेंजर्स बंगळुरू आणि सनरायझर्स हैदराबाद यांच्यात होत आहे. हा सामना 28 मार्चला बंगळुरूतील एम. चिन्नास्वामी स्टेडियममध्ये होत आहे. हा सामना भारतीय वेळेनुसार संध्याकाळी 7.30 वाजता सुरू होईल. तर नाणेफेकीचा कौल हा 7 वाजता होईल. या पहिल्या सामन्यासाठी दोन्ही संघ सज्ज झाले आहे. असं असताना रॉयल चॅलेंजर्स बंगळुरूला मोठा धक्का बसला आहे. कारण या स्पर्धेची विजयाने सुरूवात करायची आहे. पण स्टार खेळाडू सुरूवातीच्या सामन्यात खेळणार नाही हे स्पष्ट झालं आहे. रॉयल चॅलेंजर्सचा स्टार गोलंदाज जोश हेझलवूड पहिल्या सामन्यात खेळणार नाही. अजूनही त्याचं फिटनेस हवं तसं नाही. त्यामुळे पहिल्याच सामन्याला मुकणार आहे. खरं तर हेझलवूड गुरूवारी बंगळुरूत पोहोचला तेव्हा आनंदाचं वातावरण होतं. पण पहिल्या सामन्यात खेळणार नसल्याने आरसीबीचे चाहते निराश झाले आहे.
आरसीबीचे मुख्य प्रशिक्षक अँडी फ्लॉवर यांनी सांगितलं की, ‘आम्ही त्याच्या फिटनेसवर लक्ष ठेवून आहोत.’ हेझलवूड दुखापतीमुळे बऱ्याच काळापासून क्रिकेटपासून दूर आहे. नोव्हेंबर 2025 पासून हेझलवूड क्रिकेटच्या मैदानापासून दूर आहे. एशेज कसोटी मालिका आणि टी20 वर्ल्डकप स्पर्धेत खेळला नाही. त्याला हॅमस्ट्रिंग आणि अकिलीज टेंडनचा त्रास असून त्यातून अजून सावरलेला नाही. हेझलवूड हा आरसीबीचा महत्त्वाचा खेळाडू आहे. मागच्या वर्षी त्याने जबरदस्त गोलंदाजी केली होती. त्यामुळे आरसीबीला जेतेपदाची चव पहिल्यांदा चाखता आली होती. मागच्या पर्वात त्याने आरसीबीसाठी 12 सामने खेळले होते आणि 22 विकेट घेतल्या होत्या. त्याचा इकोनॉमी रेट 8.77 चा होता.
न्यूझीलंडचा वेगवान गोलंदाज जेकब डफी सध्या हेझलवूडच्या जागी संघात आहे. त्यामुळे, जोपर्यंत हेझलवूडला प्लेइंग 11 मध्ये स्थान मिळत नाही, तोपर्यंत डफी संघात खेळण्याची शक्यता आहे. दुसरीकडे, दुखापतीतून सावरत असलेल्या नुवान थुशाराला पूर्णपणे बरा होईपर्यंत आयपीएलमध्ये खेळण्यासाठी श्रीलंका क्रिकेट बोर्डाने ना हरकत प्रमाणपत्र नाकारले आहे. श्रीलंका क्रिकेट बोर्डाने अलीकडेच कठोर फिटनेस धोरण लागू केले आहे. श्रीलंका बोर्डाचा हा निर्णय आरसीबीसाठी एक मोठा धक्का आहे.
