SRH vs RR Eliminator : राजस्थानची क्वालिफायर 2 मध्ये धडक, हैदराबाद 47 धावांच्या पराभवासह आऊट
Sunrisers Hyderabad vs Rajasthan Royals Eliminator Match Result IPL 2026 : राजस्थान रॉयल्सने एलिमिनेटर सामन्यात सनरायझर्स हैदराबादसमोर 244 धावांचं आव्हान ठेवलं होतं.
रियान पराग याच्या नेतृत्वात राजस्थान रॉयल्स टीमने आयपीएल स्पर्धेच्या 19 व्या मोसमातील क्वालिफायर 2 मध्ये (IPL 2026 Qualifier 2) धडक देत ट्रॉफीच्या दिशेने 1 पाऊल पुढे टाकलं आहे. राजस्थान रॉयल्सने एलिमिनेटर सामन्यात वैभव सूर्यवंशी आणि ध्रुव जुरेल या दोघांनी केलेल्या विस्फोटक खेळीच्या जोरावर सनरायझर्स हैदराबादसमोर 244 धावांचं आव्हान ठेवलं होतं. मात्र हैदराबादला विजयी धावांचा पाठलाग करताना 20 ओव्हरही खेळता आलं नाही. हैदराबादने राजस्थानच्या गोलंदाजांसमोर गुडघे टेकले. राजस्थानने हैदराबादला 19.2 ओव्हरमध्ये 196 रन्सवर ऑलआऊट केलं. राजस्थानने यासह क्वालिफायर 2 चं तिकीट मिळवलं. तर हैदराबादचं पराभवासह पॅकअप झालं.
सामन्यात काय झालं?
हैदराबादने टॉस जिंकून राजस्थानला बॅटिंगसाठी बोलावलं. राजस्थानने या संधीचा पूर्ण फायदा घेत आयपीएल प्लेऑफच्या इतिहासातील आपली सर्वोच्च धावसंख्या नोंदवली. राजस्थानने 20 ओव्हरमध्ये 8 विकेट्स गमावून 243 धावा केल्या. राजस्थानला इथवर पोहचवण्यात वैभव सूर्यवंशी आणि ध्रुव जुरेल या दोघांनी प्रमुख भूमिका बजावली. वैभवने फक्त 29 बॉलमध्ये 97 रन्स केल्या. तर ध्रुवने 21 चेंडूत 50 धावांचं योगदान दिलं.
तसेच यशस्वी जैस्वाल याने 29 आणि कॅप्टन रियान पराग याने 26 धावा जोडल्या. डोनोवन फेरेरा आणि रवींद्र जडेजा या दोघांनी प्रत्येकी 12-12 धावा केल्या. हैदराबादकडून प्रुफल हिंगे याने सर्वाधिक 3 विकेट्स मिळवल्या. तर एशान मलिंगा, शिवांग कुमार आणि नितीश कुमार रेड्डी या तिघांनी प्रत्येकी 1-1 विकेट मिळवली.
हैदराबादच फलंदाज ढेर
जोफ्रा आर्चर याने 244 धावांचा पाठलाग करायला आलेल्या सनरायझर्स हैदराबादला डावातील दुसऱ्याच बॉलवर झटका दिला. जोफ्राने अभिषेक शर्मा याला झिरोवर आऊट केलं. तसेच स्टार विस्फोटक फलंदाजही या निर्णायक सामन्यात विक्रमी लक्ष्यासमोर फिके पडले. हैदराबादसाठी एकाही फलंदाजाला अर्धशतक सोडा 40 हा आकडाही गाठता आला नाही.
हेड-क्लासेन अपयशी
हैदराबादसाठी नितीश कुमार रेड्डी याने सर्वाधिक 38 धावा केल्या. सलील अरोरा याने 35 तर इशान किशन याने 33 धावा जोडल्या. तसेच शिवांग कुमार याने 27 रन्स केल्या. तर राजस्थानच्या गोलंदाजांनी इतर फलंदाजांना 20 धावांच्या आत रोखून मैदानाबाहेरचा रस्ता दाखवला. राजस्थानच्या गोलंदाजांसमोर ट्रॅव्हिस हेड आणि हेन्रिक क्लासेन हे दोघेही काही करु शकले नाहीत. हेडने 17 आणि क्लासेनने 18 धावा केल्या. राजस्थानसाठी जोफ्रा आर्चर याने सर्वाधिक 3 विकेट्स मिळवल्या. तर नांद्रे बर्गर, सुशांत मिश्रा आणि रवींद्र जडेजा या तिघांनी प्रत्येकी 2-2 विकेट्स मिळवल्या. तर यश राज पुंजा याने 1 विकेट घेत इतरांना चांगली साथ दिली.
स्कोअरकार्ड
राजस्थानकडून विजयासह पराभवाची मालिका खंडीत
राजस्थान रॉयल्सने हैदराबादला पराभूत करुन मोठा कारनामा केला आहे. राजस्थानने हैदराबाद विरुद्ध पराभवाची मालिका खंडीत केली आहे. हैदराबादने याआधी राजस्थान रॉयल्स विरुद्ध सलग 6 सामने जिंकले होते. मात्र राजस्थानने एकाच विजयासह पराभवाची मालिका खंडीत केली आणि हैदराबादला 19 व्या मोसमातून बाहेरचा रस्ता दाखवला आहे.
