मी आधीच सांगितलं होतं की त्याला…! प्रफुल हिंगेने वैभव सूर्यवंशीची विकेट काढल्यानंतर प्लान सांगितला

आयपीएल 2026 स्पर्धेत सनरायझर्स हैदराबादचा पाचवा सामना राजस्थान रॉयल्स संघाशी झाला. या सामन्यात हैदाराबादने राजस्थान रॉयल्सला 57 धावांनी पराभूत केलं. या विजयाचा शिल्पकार ठरला तो वेगवान गोलंदाज प्रफुल हिंगे… त्याने चार षटकात 34 धावा देत 4 विकेट काढल्या. यावेळी त्याचा इकोनॉमी रेट हा 8.50 चा होता. त्याच्या या कामगिरीसाठी सामनावीराच्या पुरस्काराने गौरविण्यात आलं. त्याने पहिल्या षटकात फक्त 1 धाव देऊन तीन गडी बाद केले. त्याच्या या खेळीमुळे राजस्थान रॉयल्सचा प्लान पहिल्याच षटकात फेल गेला. प्रफुल हिंगेने पदार्पणाच्या सामन्यातच कहर करत राजस्थान रॉयल्सचा विजयी रथ रोखला. त्याच्या भेदक गोलंदाजीमागे बरीच मेहनत घेतली. तसेच वैभव सूर्यवंशीला पहिल्याच चेंडूवर बाद करण्यामागचं गणितही सांगितलं. त्याने यासाठी कसा प्लान आखला होता ते त्याने सामन्यानंतर सांगितलं.

प्रफुल हिंगेला राजस्थान रॉयल्सविरुद्धच्या सामन्यातील सर्वोत्तम विकेटबाबत विचारलं गेलं. तेव्हा प्रफुल हिंगेने सांगितलं की, ‘सर्वोत्तम विकेट सूर्यवंशीची पहिली विकेट होती, कारण तो फॉर्मात होता. मी काही लोकांना आधीच सांगितले होते की, मी त्याला पहिल्याच चेंडूवर, बाउन्सरने किंवा इतर कोणत्याही प्रकारे बाद करेन. मला फक्त पहिल्याच चेंडूवर त्याची विकेट हवी होती. हीच योजना होती. तसेच, आमचे गोलंदाजी प्रशिक्षक वरुण भाई यांनी मला खूप मदत केली. आणि ज्यांनी मला पाठिंबा दिला त्या सर्वांचा मी आभारी आहे.’

आयपीएल स्पर्धेपूर्वी प्रफुल हिंगेला दुखापतीला सामोरं जावं लागलं होतं. पण स्पर्धा सुरू होताच फिट अँड फाईन होत संघात परतला. याबाबत त्याने सांगितलं की, ‘आता सर्व काही ठीक आहे. माझी खूप चांगली काळजी घेतल्याबद्दल मला एमआरएफचे आभार मानायचे आहेत. मी तिथे असताना, फिजिओ नवीन सरांनी माझी खूप चांगली काळजी घेतली. आज मी या टप्प्यावर पोहोचलो आहे, यासाठीही मला त्यांचे आभार मानायचे आहेत.’ आयपीएल 2026 मिनी लिलावात सनरायझर्स हैदराबादने प्रफुल हिंगेवर डाव लावला. प्रफुल हिंगेची बेस प्राईस ही 30 लाख होती आणि हैदराबादने त्याच्यावर विश्वास दाखवला. हा विश्वास प्रफुल हिंगेने पहिल्याच सामन्यात सार्थकी लावला.